ആന്ധ്രാപ്രദേശ് മുന്‍ മുഖ്യമന്ത്രിയായിരുന്ന വൈ.എസ്.ആര്‍ റെഡ്ഡിയുടെ കഥപറഞ്ഞ യാത്ര എന്ന ചിത്രത്തിന് ശേഷം വീണ്ടുമൊരു തെലുങ്ക് സിനിമ ചെയ്യാന്‍ ഒരുങ്ങുകയാണ് മമ്മൂട്ടി.
തെലുങ്ക് താരവും നാഗാര്‍ജുനയുടെ മകനുമായ അഖില്‍ അക്കിനേനി നായകനാകുന്ന ‘ഏജന്റ്’ എന്ന ചിത്രത്തിലാണ് മമ്മൂട്ടി പ്രധാന വേഷത്തിലെത്തുന്നത്. എന്നാല്‍ മമ്മൂട്ടിയുടെ കഥാപാത്രത്തെ കുറിച്ചുള്ള വിവരം പുറത്ത് വിട്ടിട്ടില്ല. വില്ലന്‍ വേഷമാണ് മമ്മൂട്ടി കൈകാര്യം ചെയ്യുന്നത് എന്ന തരത്തില്‍ ചില വാര്‍ത്തകള്‍ മുന്‍പ് വന്നിരുന്നു. മലയാളത്തിന് പുറത്ത് നായകനോ, നായക തുല്യ വേഷമോ മാത്രം കൈകാര്യം ചെയ്തിട്ടുള്ള മമ്മൂട്ടി ഏജന്റില്‍ ഏത് തരത്തിലുള്ള കഥാപാത്രത്തെയാണ് അവതരിപ്പിക്കുകയെന്നത് അറിയാന്‍ ആരാധകര്‍ ആവേശത്തോടെ കാത്തിരിക്കുകയാണ്.
ചിത്രത്തിന്റെ ഷൂട്ടിംഗിനായി മമ്മൂട്ടി ഒക്ടോബര്‍ 20ന് യൂറോപ്പിലേക്ക് തിരിക്കും. നിലവില്‍ ഏജന്റിന്റെ യൂറോപ്പിലുള്ള ചിത്രീകരണം പുരോഗമിക്കുകയാണ്. നവംബര്‍ ആദ്യ വാരം വരെയാണ് യൂറോപ്പിലെ ഷൂട്ടിങ്. തുടര്‍ന്ന് ഹൈദരാബാദ്, വിശാഖപട്ടണം എന്നിവിടങ്ങളിലായിട്ടാണ് ഷെഡ്യൂള്‍ പ്ലാന്‍ ചെയ്തിരിക്കുന്നത്. സുരേന്ദര്‍ റെഡ്ഡിയാണ് ചിത്രത്തിന്റെ സംവിധായകന്‍. രാമബ്രഹ്മം ശങ്കരയാണ് ചിത്രം നിര്‍മ്മിക്കുന്നത്. ഹോളിവുഡ് ത്രില്ലര്‍ സീരിസായിരുന്ന ബോണില്‍ നിന്ന് പ്രചോദനം ഉള്‍ക്കൊണ്ടാണ് ചിത്രം ഒരുക്കുന്നത്. ക്രിസ്മസിന് ചിത്രം തിയറ്ററുകളില്‍ പ്രദര്‍ശനത്തിനെത്തും.
Recent Comments