ഇക്കഴിഞ്ഞ ശനിയാഴ്ച സുരേഷ്‌ഗോപി കൊല്ലത്ത് എത്തിയിരുന്നു. ഫാത്തിമാ മാതാ നാഷണല്‍ കോളേജിലെ പൂര്‍വ്വവിദ്യാര്‍ത്ഥി സംഗമത്തില്‍ പങ്കെടുക്കാന്‍ എത്തിയതായിരുന്നു അദ്ദേഹം. 1975-76 പ്രീഡിഗ്രി ബാച്ചിലെ പൂര്‍വ്വ വിദ്യാര്‍ത്ഥിയാണ് സുരേഷ്‌ഗോപി. അന്ന് അദ്ദേഹത്തിന്റെ സഹപാഠിയും ഇപ്പോള്‍ പാര്‍ലമെന്റംഗവുമായ എന്‍.കെ. പ്രേമചന്ദ്രനും ചടങ്ങില്‍ പങ്കെടുത്തിരുന്നു. മടക്കയാത്രയ്ക്കിടെ ജോഷി ചിത്രമായ പാപ്പനെക്കുറിച്ച് ചോദിച്ചപ്പോള്‍ അദ്ദേഹം പറഞ്ഞു.
‘ഡിസംബര്‍ 16 ന് മലയാറ്റൂരില്‍ ഷൂട്ടിംഗ് തുടങ്ങും. ഇരുപതോടെ ഞാന്‍ ജോയിന്‍ ചെയ്യും. ഞായറാഴ്ച ന്യൂഡല്‍ഹിക്ക് പോകുന്നുണ്ട്. പാര്‍ലമെന്റിന്റെ ശീതകാല സമ്മേളനം നടക്കുകയാണ്. 16 ന് തിരുവനന്തപുരത്തെത്തും. പത്മനാഭസ്വാമി ക്ഷേത്രത്തിലെ ഭജനമഠത്തില്‍ നടക്കുന്ന ശ്രീചക്രപൂജയില്‍ യജമാനനായി പങ്കെടുക്കുന്നത് ഞാനാണ്. 17-ാം തീയതിയാണ് അവിടുത്തെ ചടങ്ങുകള്‍ അവസാനിക്കുന്നത്. അത് കഴിഞ്ഞ് പാപ്പനില്‍ ജോയിന്‍ ചെയ്യും.’
രണ്ടാം കോവിഡ് വ്യാപനത്തെത്തുടര്‍ന്ന് ഏപ്രിലില്‍ നിര്‍ത്തിവച്ച ഷൂട്ടിംഗാണ് പുനരാരംഭിക്കാന്‍ പോകുന്നത്.
വിജയരാഘവന്‍, ജനാര്‍ദ്ദനന്‍, ഗോകുല്‍ സുരേഷ്‌ഗോപി, നന്ദു, ടിനിടോം, ചന്തുനാഥ്, ഷമ്മി തിലകന്‍, ബിനു പപ്പു, നീതാ പിള്ള, ആശാ ശരത്ത്, കനിഹ, നൈല ഉഷ, ജുവല്‍ മേരി തുടങ്ങി വന്‍താരനിരതന്നെ ചിത്രത്തിന് പിന്നിലുണ്ട്.
ഡേവിഡ് കാച്ചാപ്പിള്ളി പ്രൊഡക്ഷനും ഇഫാര്‍ മീഡിയയും ചേര്‍ന്നാണ് ഈ ബിഗ് ബജറ്റ് ചിത്രം നിര്‍മ്മിക്കുന്നത്. ഡേവിഡ് കാച്ചാപ്പിള്ളിയും റാഫി മതിരയുമാണ് നിര്‍മ്മാതാക്കള്‍. സുജിത് ജെ. നായരും ഷാജിയും കോ പ്രൊഡ്യൂസേഴ്‌സാണ്.
Recent Comments