സംഗീതസംവിധായകന്‍ കൈതപ്രം വിശ്വനാഥന്‍ നമ്പൂതിരി അന്തരിച്ചു. അര്‍ബ്ബുദ ബാധിതനായി ഒരു വര്‍ഷത്തിലേറെയായി ചികിത്സയിലായിരുന്നു. കുറച്ചുമുമ്പ് കോഴിക്കോട് എം.വി.ആര്‍. ഹോസ്പിറ്റലില്‍വച്ചായിരുന്നു അന്ത്യം. 58 വയസ്സായിരുന്നു. പ്രശസ്ത കവിയും ഗാനരചയിതാവുമായ കൈതപ്രം ദാമോദരന്‍ നമ്പൂതിരി ജ്യേഷ്ഠനാണ്.
കര്‍ണ്ണാടക സംഗീതജ്ഞനായിരുന്ന കണ്ണാടി കേശവന്‍ നമ്പൂതിരിയും ആതിഥി അന്തര്‍ജ്ജനവുമാണ് മാതാപിതാക്കള്‍.
ജയരാജ് സംവിധാനം ചെയ്ത കണ്ണകി എന്ന ചിത്രത്തിന് സംഗീതസംവിധാനം നിര്‍വ്വഹിച്ചുകൊണ്ടായിരുന്നു തുടക്കം. അതിനുമുമ്പേ ജയരാജിന്റെതന്നെ ചലച്ചിത്രങ്ങളായ ദേശാടനത്തിനുവേണ്ടിയും കളിയാട്ടത്തിനുവേണ്ടിയും ഒര്‍ക്കസ്‌ട്രേഷനും നിര്‍വ്വഹിച്ചിട്ടുണ്ട്. കണ്ണകിയിലെ കരിനീല കണ്ണഴകി…, ഇനിയൊരു ജന്മമുണ്ടെങ്കില്‍…, എന്നുവന്നു നീ… തുടങ്ങിയവ അദ്ദേഹം ഈണം പകര്‍ന്ന ഗാനങ്ങളില്‍ ചിലതാണ്. തിളക്കത്തിലെ എനിക്കൊരു പെണ്ണുണ്ട്…, നീയൊരു പുഴയായി… തുടങ്ങിയ ഗാനങ്ങള്‍ക്കും ഈണം പകര്‍ന്നത് വിശ്വനാഥന്‍ നമ്പൂതിരിയായിരുന്നു. ദൈവനാമത്തില്‍, മധ്യവേനല്‍, ഏകാന്തം, കൗസ്തുഭം തുടങ്ങിയവ അദ്ദേഹം സംഗീതസംവിധാനം നിര്‍വ്വഹിച്ച ചിത്രങ്ങളാണ്. കൗസ്തുഭം എന്ന ചിത്രത്തില്‍ അദ്ദേഹം അഭിനയിച്ചിട്ടുമുണ്ട്.
ഗൗരി അന്തര്‍ജ്ജനമാണ് ഭാര്യ, അദിതി, നര്‍മ്മദ, കേശവ് എ്‌നിവര്‍ മക്കളുമാണ്.
Recent Comments