നവാഗത സംവിധായകന്‍ സൂരജ് സുകുമാര്‍ നായര്‍ ഒരുക്കിയ റൂട്ട്മാപ്പിലെ ഗാനം റിലീസായി. മലയാളികളുടെ പ്രിയതാരങ്ങള്‍ തങ്ങളുടെ ഫെയ്‌സ്ബുക്ക് പേജിലൂടെയാണ് ഗാനം റിലീസ് ചെയ്തത്. ഏറെ പ്രണയാതുരമായ ഈ ഗാനം ആലപിച്ചിരിക്കുന്നത് യുവഗായകരായ നിഖില്‍ മാത്യുവും നയന നായരുമാണ്. ശരത്ത് രമേഷിന്റെ വരികള്‍ക്ക് പ്രശാന്ത് കര്‍മ്മയാണ് സംഗീതം നല്‍കിയിരിക്കുന്നത്.
പത്മശ്രീ മീഡിയയുടെ ബാനറില്‍ ശബരീനാഥ് ജി. നിര്‍മ്മിക്കുന്ന ചിത്രം സംവിധാനം ചെയ്യുന്നത് യുവസംവിധായകനായ സൂരജ് സുകുമാര്‍ നായരാണ്. പൊളിഞ്ഞ് കിടന്ന ഒരു ഗോഡൗണില്‍ കലാസംവിധായകന്‍ മനോജ് ഗ്രീന്‍വുഡ്‌സിന്റെ നേതൃത്വത്തില്‍ അണിയിച്ചൊരുക്കിയ സെറ്റാണ് ഗാനത്തിന്റെ ഹൈലൈറ്റ്. ഈ പ്രണയാതുരഗാനത്തിന് അനീഷ് റഹ്മാനാണ് കോറിയോഗ്രാഫി ചെയ്തിരിക്കുന്നത്.
ലോക്ക് ഡൗണ്‍ കാലം മലയാളികള്‍ക്ക് എത്രയെത്ര അനുഭവങ്ങളാണ് നല്‍കിയത്. അത്തരത്തില്‍ വ്യത്യസ്തമായ ഒരു അനുഭവത്തെ പ്രമേയമാക്കിയ ചിത്രമാണ് ‘റൂട്ട് മാപ്പ്’.
ഏറെ കൗതുകരമായ സംഭവത്തെ സസ്‌പെന്‍സും കോമഡിയും ചേര്‍ത്ത് അവതരിപ്പിക്കുകയാണ്. സെന്‍സറിംഗ് പൂര്‍ത്തിയായ ചിത്രം താമസിയാതെ പ്രേക്ഷകരിലേക്കെത്തും. ചെന്നൈ, തിരുവനന്തപുരം, കൊച്ചി എന്നിവിടങ്ങളിലായിരുന്നു പ്രധാന ലൊക്കേഷനുകള്‍. സൂരജ് സുകുമാരന്‍ നായരും അരുണ്‍ കായംകുളവും ചേര്‍ന്നായിരുന്നു തിരക്കഥ ഒരുക്കിയത്. ആഷിക് ബാബു, അരുണ്‍ ടി ശശി എന്നിവരാണ് ക്യാമറ ചലിപ്പിച്ചത്.
മക്ബൂല്‍ സല്‍മാന്‍, സുനില്‍ സുഗത, നാരായണന്‍കുട്ടി, ഷാജു ശ്രീധര്‍, ആനന്ദ് മന്മഥന്‍, ഗോപു കിരണ്‍, ദീപക് ദിലീപ്, സിന്‍സീര്‍, പൂജിത, എയ്ഞ്ചല്‍, ശ്രുതി, രാജേശ്വരി, ഡിജോ ജോസ് ആന്റണി തുടങ്ങി വലിയ താരനിര തന്നെ ചിത്രത്തില്‍ അണിനിരക്കുന്നുണ്ട്. പിആര്‍ഒ പി ആര്‍ സുമേരന്‍.
Recent Comments