അഭിലാഷ് രാഘവന്‍ സംവിധാനം ചെയ്യുന്ന പുതിയ ചിത്രമാണ് പ്രതിഭാ ട്യൂട്ടോറിയല്‍സ്. ചിത്രത്തിന്റെ ഷൂട്ടിംഗ് മാര്‍ച്ച് 9 ന് കോഴിക്കോട് ആരംഭിക്കും. ഒരു മുഴുനീള ആക്ഷേപഹാസ്യ ചിത്രമാണ് പ്രതിഭാ ട്യൂട്ടോറിയല്‍സ്.
സംവിധായകരായ ജി.എസ്. വിജയന്‍, നിസ്സാര്‍ എന്നിവരുടെ കീഴില്‍ സംവിധാനസഹായിയായിരുന്നു അഭിലാഷ് രാഘവന്‍. അദ്ദേഹത്തിന്റെ ആദ്യചിത്രം ഓര്‍മ്മപ്പൂക്കളാണ്. ആറുപതോളം പരസ്യചിത്രങ്ങളും അഭിലാഷ് സംവിധാനം ചെയ്തിട്ടുണ്ട്.
ജോണി ആന്റണി, സുധീഷ്, പാഷാണം ഷാജി, നിര്‍മ്മല്‍ പാലാഴി, ശിവജി ഗുരുവായൂര്‍, ജാഫര്‍ ഇടുക്കി, വിജയകൃഷ്ണന്‍ (ഹൃദയം ഫെയിം) അല്‍ത്താഫ് സലിം, ജയകൃഷ്ണന്‍, അപ്പുണ്ണി ശശി, സാജു കൊടിയന്‍, എല്‍ദോ രാജു(ഓപ്പറേഷന്‍ ജാവാ ഫെയിം), മണികണ്ഠന്‍, അഞ്ജനാ അപ്പുക്കുട്ടന്‍, ടീനാ സുനില്‍, പ്രീതി രാജേന്ദ്രന്‍, മഹിത കൃഷ്ണ, മനീഷാ മോഹന്‍, ജ്യോതികൃഷ്ണ ആലപ്പുഴ എന്നിവര്‍ക്കൊപ്പം നിരവധി പുതുമുഖങ്ങളും ഈ ചിത്രത്തില്‍ അഭിനയിക്കുന്നു. ഹിന്ദി നടി സ്വാതി ത്യാഗിയാണ് നായിക. പാടാത്ത പൈങ്കിളി എന്ന ജനപ്രിയ പരമ്പരയിലുടെ ശ്രദ്ധേയനായ സൂരജ് സണ്‍ ഈ ചിത്രത്തിലൂടെ ആദ്യമായി ബിഗ് സ്‌ക്രീനിലെത്തുന്നു.
ഗുഡ് ഡേമൂവീസിന്റെയും അനാമിക മൂവീസിന്റെയും ബാനറില്‍ എ.എം. ശ്രീലാല്‍ പ്രകാശനും, ജോയ് അനാമികയും ചേര്‍ന്നാണ് ഈ ചിത്രം നിര്‍മ്മിക്കുന്നത്.
ഗാനങ്ങള്‍ക്ക് ഏറെ പ്രാധാന്യമുള്ള ഈ ചിത്രത്തിനുവേണ്ടി വരികളെഴുതുന്നത് ഹരി നാരായണന്‍, മനു മഞ്ജിത്ത്, ഹരിതാ ബാബു എന്നിവരാണ്. കൈലാസ് മേനോന്‍ ഈണം പകരുന്നു. ഏറ്റവും മികച്ച ഗായികയ്ക്കുള്ള സംസ്ഥാന സര്‍ക്കാരിന്റെ പുരസ്‌ക്കാരം നേടിയ നിത്യാ മാമ്മന്‍ ഈ ചിത്രത്തിനുവേണ്ടി പാടുന്നുണ്ട്.
ഛായാഗ്രഹണം രാഹുല്‍ സി. വിമല, എഡിറ്റിംര്‍ റെജിന്‍ കെ.കെ., കലാസംവിധാനം മുരളി ബേപ്പൂര്‍, കോസ്റ്റ്യംഡിസൈര്‍ ചന്ദ്രന്‍ ചെറുവണ്ണൂര്‍, മേക്കപ്പ് രാജന്‍ മാസ്‌ക്ക്, ചീഫ് അസ്സോസ്സിയേറ്റ് ഡയറക്ടര്‍ ജയേന്ദ്ര ശര്‍മ്മ, പ്രൊഡക്ഷന്‍ കണ്‍ട്രോളര്‍ നിജില്‍ ദിവാകര്‍. വാര്‍ത്താപ്രചരണം വാഴൂര്‍ ജോസ്.
Recent Comments