ഭാവന ഏറ്റവും ഒടുവിലായി അഭിനയിച്ച മലയാളചിത്രം ആദം ജോണാണ്. പൃഥ്വിരാജായിരുന്നു നായകന്‍. 2017 ലാണ് ചിത്രം പ്രദര്‍ശനത്തിനെത്തിയത്. അതിനുശേഷം ചില കന്നഡ ചിത്രങ്ങളില്‍ അവര്‍ അഭിനയിച്ചിട്ടുണ്ട്. മലയാളത്തിലേയ്ക്കുള്ള അവരുടെ തിരിച്ചുവരവിന്റെ സൂചനകള്‍ പ്രശസ്ത മാധ്യമപ്രവര്‍ത്തകയായ ബര്‍ഖാ ദത്തിന് നല്‍കിയ അഭിമുഖത്തില്‍ ഭാവന നല്‍കിയിരുന്നു. അതിന് പിന്നാലെ ഭാവന തന്നെയാണ് തന്റെ സോഷ്യല്‍ പേജിലൂടെ പുതിയ ചിത്രത്തിന്റെ അനൗണ്‍സ്‌മെന്റ് നടത്തിയിരിക്കുന്നത്. മമ്മൂട്ടിയും ഈ ചിത്രത്തിന്റെ വിശേഷങ്ങള്‍ പങ്കുവച്ചിട്ടുണ്ട്.
‘ന്റിക്കാക്കാക്കൊരു പ്രേമണ്ടാര്‍ന്ന്!’ എന്നാണ് ചിത്രത്തിന്റെ പേര്. വൈക്കം മുഹമ്മദ് ബഷീറിന്റെ പ്രശസ്തമായ ‘ന്റുപ്പുപ്പാക്കൊരാേനണ്ടാര്‍ന്ന്!’ എന്ന കഥയുടെ പേരിനെ ഓര്‍മ്മപ്പെടുത്തുന്നതാണ് ചിത്രത്തിന്റെ ടൈറ്റില്‍. കഥയെക്കുറിച്ചുള്ള വിശദാംശങ്ങളൊന്നും പുറത്ത് വിട്ടിട്ടില്ല. ഷറഫുദ്ദീനും ഭാവനയുമാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്.
ആദില്‍ മൈമൂനത്ത് അഷറഫാണ് ചിത്രത്തിന്റെ തിരക്കഥാകൃത്തും സംവിധായകനും. മുമ്പ് അമല്‍ നീരദിനോടൊപ്പം സംവിധാനസഹായിയായി ആദില്‍ പ്രവര്‍ത്തിച്ചിട്ടുണ്ട്. ബോണ്‍ഹോം എന്റര്‍ടെയിന്‍മെന്റ്‌സിന്റെ ബാനറില്‍ റെനിഷ് അബ്ദുള്‍ഖാദര്‍ ആണ് ചിത്രം നിര്‍മ്മിക്കുന്നത്. ശ്യാം മോഹനാണ് എക്‌സിക്യൂട്ടീവ് പ്രൊഡ്യൂസര്‍. അരുണ്‍ റുഷ്ദി ഛായാഗ്രഹണം നിര്‍വ്വഹിക്കുന്ന ചിത്രത്തിന്റെ കലാസംവിധാനം അനീസ് നാടോടിയും കോസ്റ്റിയൂം മെല്‍വിയും മേക്കപ്പ് അമല്‍ ചന്ദ്രനും നിര്‍വ്വഹിക്കുന്നു. അലക്‌സ് ഇ. കുര്യനാണ് പ്രൊഡക്ഷന്‍ കണ്‍ട്രോളര്‍. വിനായക് ശശികുമാറിന്റെ വരികള്‍ക്ക് പോള്‍മാത്യു, നിഷാന്ത് രാംടെകെ, ജോക്കല്‍ ബ്ലൂസ് എന്നിവര്‍ ചേര്‍ന്ന് ഈണം പകരുന്നു.
Recent Comments