ജെന്റില്‍മാന്‍ 2-ാം ഭാഗത്തില്‍ നായികയായി നയന്‍താര ചക്രവര്‍ത്തി എത്തുന്നു. ഇത് സംബന്ധിച്ച് താരവുമായി നിര്‍മ്മാതാവ് കെ.ടി. കുഞ്ഞുമോന്‍തന്നെ ചര്‍ച്ച നടത്തിയിരുന്നു. അതിനൊടുവിലാണ് നയന്‍താര ചക്രവര്‍ത്തി പ്രൊജക്ട് കമ്മിറ്റ് ചെയ്തതും. ഇത് സംബന്ധിച്ച ഔദ്യോഗിക വാര്‍ത്ത ഇന്ന് ഉച്ചയോടെ നിര്‍മ്മാതാവ് കെ.ടി. കുഞ്ഞുമോന്‍തന്നെ പുറത്തുവിടും. നേരത്തെ ചിത്രത്തിന്റെ സംഗീതസംവിധായകനായി എം.എം. കീരവാണിയെയും പ്രഖ്യാപിച്ചിരുന്നു.
ശങ്കറായിരുന്നു ജെന്റില്‍മാനിന്റെ സംവിധായകന്‍. എന്നാല്‍ രണ്ടാം ഭാഗത്തിന്റെ സംവിധായകനെ ഇനിയും വെളിപ്പെടുത്തിയിട്ടില്ല. കൂടുതല്‍ താരനിര്‍ണ്ണയവും പൂര്‍ത്തിയായിട്ടുണ്ട്. വരും ദിവസങ്ങള്‍ ഓരോരുത്തരായി അവതരിപ്പിക്കാനാണ് പദ്ധതിയെന്നും നിര്‍മ്മാതാവ് കെ.ടി. കുഞ്ഞുമോന്‍ പറഞ്ഞു.
കിലുക്കം കിലുകിലുക്കത്തിലൂടെ ബാലതാരമായി അരങ്ങേറ്റം കുറിച്ച അഭിനേത്രിയാണ് നയന്‍താര ചക്രവര്‍ത്തി. തുടര്‍ന്ന് ചെസ്സ്, നോട്ടുബുക്ക്, ഇന്‍സ്‌പെക്ടര്‍ ഗരുഡ്, ആകാശം, സൂര്യന്‍, കങ്കാരു, നോവല്‍ തുടങ്ങിയ ചിത്രങ്ങളിലും അഭിനയിച്ചു. രജനികാന്ത് നായകനായ കുസേലനാണ് നയന്‍താര ചക്രവര്‍ത്തിയുടെ ആദ്യ തമിഴ് ചിത്രം. തെലുങ്ക് ചിത്രത്തിലും അവര്‍ അഭിനയിച്ചിട്ടുണ്ട്. ജെന്റില്‍മാന്‍ 2 ലെ നായികാപദവി നയന്‍താരയുടെ കരിയറില്‍ വന്‍ വഴിത്തിരിവാകുമെന്നുതന്നെ പ്രതീക്ഷിക്കണം.
Recent Comments