അടിച്ചാല്‍ തിരിച്ചടിക്കും. അതാണ് ബൂമറാംഗ് എന്ന ചിത്രത്തിന് അണിയറക്കാര്‍ നല്‍കിയിരിക്കുന്ന ടാഗ് ലൈന്‍. ബൂമറാംഗ് എന്ന ആയുധംതന്നെ അതാണ്, കൃത്യം കഴിഞ്ഞാല്‍ അതുപയോഗിക്കുന്ന ആളുടെ അടുത്തേക്കുതന്നെ തിരിച്ചെത്തും. അതുകൊണ്ടാണ് അടിച്ചാല്‍ തിരിച്ചടിക്കും എന്ന അര്‍ത്ഥവത്തായ ടാഗ് ലൈന്‍ കഥയ്ക്ക് നല്‍കിയിരിക്കുന്നത്.
സാമൂഹിക മാധ്യമങ്ങളിലൂടെ നാം നടത്തുന്ന പ്രതികരണങ്ങള്‍ എങ്ങനെയൊക്കെ മറ്റൊരാളെ ബാധിക്കുമെന്ന് ഈ ചിത്രം പറയുന്നു. ആക്ഷേപഹാസ്യത്തോടെ അവതരിപ്പിക്കുന്ന ഒരു ഡാര്‍ക്ക് ത്രില്ലറാണ് ബൂമറാംഗ്.
ബൈജു സന്തോഷ്, ഷൈന്‍ ടോം ചാക്കോ, ചെമ്പന്‍ വിനോദ്, ഡൈന്‍ ഡേവിസ്, സംയുക്താമേനോന്‍ എന്നിവരാണ് ചിത്രത്തിലെ കേന്ദ്രകഥാപാത്രങ്ങളെ അവതരിപ്പിക്കുന്നത്. വിവേക് വിശ്വം, അഖില്‍ കവലയൂര്‍, ഹരികൃഷ്ണന്‍, നിധിന, മഞ്ജു സുഭാഷ്, സുബ്ബലക്ഷ്മി, നിയ, അപര്‍ണ്ണ, നിമിഷ, ബേബി പാര്‍ത്ഥവി എന്നിവരും താരനിരയിലുണ്ട്.
മനു സുധാകരനാണ് ബൂമറാംഗിന്റെ സംവിധായകന്‍. ബര്‍മുഡയ്ക്കുശേഷം കൃഷ്ണദാസ് പങ്കിയാണ് ബൂമറാംഗിനുവേണ്ടി കഥയും തിരക്കഥയും സംഭാഷണവും എഴുതിയിരിക്കുന്നത്. പൂര്‍ണ്ണമായും എറണാകുളത്ത് ചിത്രീകരിച്ച ബൂമറാംഗിന്റെ ഷൂട്ടിംഗ് പൂര്‍ത്തിയായി. മേയില്‍ ചിത്രം പ്രദര്‍ശനത്തിനെത്തും. ഈസിഫ്‌ളൈ പ്രൊഡക്ഷന്‍സിന്റെ ബാനറില്‍ അജി മേടയില്‍, തൗഫിഖ് ആര്‍. എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്.
Recent Comments