മീര ജാസ്മിന്‍ ജയറാം എന്നിവരെ പ്രധാന കഥാപാത്രങ്ങളാക്കി മലയാളികളുടെ പ്രിയ സംവിധായകന്‍ സത്യന്‍ അന്തിക്കാട് ഒരുക്കുന്ന പുതിയ ചിത്രമാണ് മകള്‍.
മീരയുടെ ഒപ്പം ജയറാമിന്റെയും മടങ്ങി വരവ് എന്ന തരത്തില്‍ വളരെ പ്രതീക്ഷയോടെ പ്രേക്ഷകര്‍ കാത്തിരിക്കുന്ന ചിത്രം കൂടിയാണ് മകള്‍. നിലവില്‍ ചിത്രത്തിന്റെ ട്രെയിലര്‍ പുറത്തിറങ്ങിയിരിക്കുകയാണ്. നര്‍മ്മവും അതോടൊപ്പം തന്നെ ഉദ്വേഗം ജനിപ്പിക്കുന്ന പുതിയ ട്രെയിലര്‍ ഇതിനോടകം തന്നെ പ്രേക്ഷകര്‍ ഏറ്റെടുത്തിരിക്കുകയാണ്.
ഒരു മനോഹര കുടുംബചിത്രമായിരിക്കും ‘മകള്‍’ എന്ന സൂചനയാണ് ട്രെയിലര്‍ നല്‍കുന്നത്. ജയറാമും മീര ജാസ്മിനും ഭാര്യഭര്‍ത്താക്കന്മാരായി എത്തുമ്പോള്‍ ഞാന്‍ പ്രകാശനിലൂടെ ശ്രദ്ധേയയായ ദേവിക സഞ്ജയ് മകളുടെ വേഷം ചെയ്യുന്നു. നസ്ലിനും ചിത്രത്തില്‍ ഒരു പ്രധാനകഥാപാത്രത്തെ അവതരിപ്പിക്കുന്നു. ഇന്നസെന്റ്, ശ്രീനിവാസന്‍, ശ്രീലത, സിദ്ദിഖ്, അല്‍ത്താഫ് എന്നിവരാണ് മറ്റ് അഭിനേതാക്കള്‍.
ആറ് വര്‍ഷത്തിന് ശേഷം മീരാ ജാസ്മിന്‍ ഒരു മുഴുനീള വേഷത്തില്‍ തിരിച്ചെത്തുന്ന ചിത്രം കൂടിയാണ് ‘മകള്‍’. ‘പത്തു കല്‍പ്പനകള്‍’ എന്ന ചിത്രത്തിലാണ് മീര അവസാനമായി അഭിനയിച്ചത്. എബ്രിഡ് ഷൈനിന്റെ ‘പൂമരത്തില്‍’ അതിഥി വേഷം ചെയ്തിരുന്നു.
എസ്. കുമാര്‍ ഛായാഗ്രഹണം. വിഷ്ണു വിജയ് സംഗീതം. മനു ജഗദ് കലാസംവിധാനവും സമീറ സനീഷ് വസ്ത്രലങ്കാരവും നിര്‍വഹിക്കുന്നു. ഏപ്രില്‍ 29ന് ചിത്രം തിയേറ്ററുകളിലെത്തും. സെന്‍ട്രല്‍ പിക്ചേഴ്സാണ് ചിത്രം തിയേറ്ററുകളിലെത്തിക്കുന്നത്.
Recent Comments