റഹ്മാന് ആദ്യമായി അഭിനയിക്കുന്ന ഹിന്ദി ചിത്രമാണ് ഗണ്‍പത്. വികാസ് ബഹല്‍ ആണ് ചിത്രത്തിന്റെ സംവിധായകന്‍. ടൈഗര്‍ ഷ്‌റോഫ് കൃതി സനോന്‍, ഗൗഹര്‍ ഖാന്‍ എന്നിവര്‍ക്കൊപ്പം അതിഥിതാരമായി അമിതാഭ് ബച്ചനും ചിത്രത്തില്‍ അഭിനയിക്കുന്നു. റഹ്മാന്റെ അച്ഛന്റെ വേഷമാണ് അമിതാഭിന്.
കഴിഞ്ഞ ഒക്ടോബറില്‍ ലണ്ടനില്‍ ചിത്രീകരണം ആരംഭിച്ച ഗണ്‍പത്തിന്റെ ഷൂട്ടിംഗ് ഇപ്പോള്‍ മുംബയില്‍ പുരോഗമിക്കുന്നു. ആക്ഷന്‍ ത്രില്ലര്‍ മൂവിയാണ്. 2075 ല്‍ നടക്കുന്ന സംഭവങ്ങളാണ് കഥയുടെ ഇതിവൃത്തമെന്നറിയുന്നു. സ്വാഭാവികമായും ഗ്രീന്‍മാറ്റിലാണ് ചിത്രത്തിന്റെ ഏറിയപങ്കും ഷൂട്ട് ചെയ്തിരിക്കുന്നത്. ലണ്ടനിലെ സ്റ്റുഡിയോ ഫ്‌ളോറുകള്‍ ഉപയോഗപ്പെടുത്തിയതും ഇതേ കാരണത്താലാണ്.
ആക്ഷന്‍ രംഗങ്ങളാണ് ഇപ്പോള്‍ ചിത്രീകരിച്ചുകൊണ്ടിരിക്കുന്നത്. സ്റ്റുഡിയോ ഫ്‌ളോറിനുള്ളില്‍ തീര്‍ത്ത ബോംക്‌സിംഗ് റിംഗിനുള്ളിലാണ് ചിത്രീകരണം. റഹ്മാന്റെ ഇന്‍ട്രൊഡക്ഷന്‍ ഫൈറ്റ് കൂടിയാണ്. പ്രധാന അഭിനേതാക്കള്‍ക്കൊപ്പം മുന്നൂറിലേറെ ജൂനിയര്‍ ആര്‍ട്ടിസ്റ്റുകളും പങ്കെടുക്കുന്നുണ്ട്. ഷോട്ടില്‍ കരാട്ടെ കിക്ക് ചെയ്യുന്നതിനിടെയായിരുന്നു റഹ്മാന്റെ തുടയ്ക്ക് പരിക്കേറ്റത്. തുടര്‍ന്ന് രണ്ട് ദിവസത്തെ വിശ്രമം അനുവദിച്ചിട്ടുണ്ട്. ഷൂട്ടിംഗ് ബ്രേക്ക് ചെയ്തിട്ടില്ല.
Recent Comments