ശിവകാര്‍ത്തികേയനെ നായകനാക്കി നവാഗതനായ സിബി ചക്രവര്‍ത്തി സംവിധാനം ചെയ്ത പുതിയ ചിത്രമാണ് ഡോണ്‍. ലൈക്ക പ്രൊഡക്ഷന്‍സ്, റെഡ് ജെയന്റ മൂവീസ്, പിവിആര്‍ പിക്ചര്‍സ് എന്നീ ബാനറുകള്‍ ചേര്‍ന്നാണ് ഈ ചിത്രം നിര്‍മ്മിച്ചിരിക്കുന്നത്. ഫണ്‍ ഫാമിലി എന്റെര്‍റ്റൈനറാണ് ഡോണ്‍. ചിത്രം മെയ് 13 ന് തിയേറ്ററുകളില്‍ എത്തും. ‘ഡോക്ടര്‍’ എന്ന സൂപ്പര്‍ഹിറ്റ് ചിത്രത്തിന് ശേഷം ശിവകാര്‍ത്തികേയന്റ തീയേറ്റര്‍ റിലീസ് കൂടിയാണ് ‘ഡോണ്‍’.
ഭാവിയിലെന്തായി തീരണമെന്ന് കണ്‍ഫ്യൂഷനടിച്ചു നടക്കുന്ന നായകന്റെ സ്‌കൂള്‍ കാലഘട്ടവും പ്രണയവും കാമ്പസ് ജീവിതവുമെല്ലാം ഉള്‍പ്പെടുത്തിയാണ് ചിത്രത്തിന്റെ ട്രെയിലര്‍ അണിയിച്ചൊരുക്കിയിരിക്കുന്നത്. സോണി മ്യൂസിക് സൗത്ത് യൂട്യൂബ് ചാനലിലൂടെയാണ് ട്രെയിലര്‍ പുറത്ത് വിട്ടിരിക്കുന്നത്. രണ്ടു ദിവസം കൊണ്ട് 9.2 മില്യണ്‍ കാഴ്ചക്കാരുമായി ട്രെയിലര്‍ ട്രെന്‍ഡിംഗ് ലിസ്റ്റില്‍ തുടരുകയാണ്.
‘മാനാട്’ എന്ന സൂപ്പര്‍ ഹിറ്റിന് ശേഷം എസ്.ജെ സൂര്യ നെഗറ്റീവ് റോളില്‍ എത്തുന്ന ചിത്രം എന്ന പ്രത്യേകതയും ‘ഡോണി’നുണ്ട്. ‘ഡോക്ടറി’ല്‍ ശിവകാര്‍ത്തികേയന്റെ ജോഡിയായിരുന്ന പ്രിയങ്ക മോഹനാണ് ഈ ചിത്രത്തിലും നായിക. ശിവാങ്കി കൃഷ്ണ കുമാര്‍, സമുദ്രക്കനി, സൂരി എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. അനിരുദ്ധ് രവിചന്ദറാണ് സംഗീത സംവിധായകന്‍.
Recent Comments