ബിഗ് ബോസ് താരവും മോട്ടിവേഷണല്‍ സ്പീക്കറും ഡോക്ടറുമായ റോബിന്‍ രാധാകൃഷ്ണന്‍ സിനിമാരംഗത്തേയ്ക്ക്. പ്രശസ്ത നിര്‍മ്മാതാവായ സന്തോഷ് ടി കുരുവിളയുടെ എസ്.ടി.കെ. ഫ്രെയിംസ് നിര്‍മ്മിക്കുന്ന ചിത്രത്തിലാണ് താരം അഭിനയിക്കുന്നത്. സുപ്രധാനമായ ഒരു കഥാപാത്രത്തെയാണ് അവതരിപ്പിക്കുന്നത്.
തിരുവനന്തപുരം ജി.ജി. ആശുപത്രിയില്‍ എമര്‍ജന്‍സി മെഡിസിന്‍ വിഭാഗത്തിലെ ഡ്യൂട്ടി മെഡിക്കല്‍ ഓഫീസറാണ് റോബിന്‍. സോഷ്യല്‍ മീഡിയയിലൂടെ ശ്രദ്ധിക്കപ്പെട്ട റോബിന്‍ ഡോ.മച്ചാന്‍ എന്ന പേരിലാണ് അറിയപ്പെടുന്നത്. ബിഗ് ബോസ് മലയാളം നാലാം സീസണിലെ മത്സാര്‍ത്ഥിയായിരിക്കെ, നല്‍കപ്പെട്ട ഒരു ടാസ്‌ക്കിനിടയില്‍ എതിര്‍വശത്തുണ്ടായിരുന്ന മത്സരാര്‍ത്ഥിയെ ബലം പ്രയോഗിച്ച് തള്ളി എന്ന കാരണത്താലാണ് ബിഗ്‌ബോസില്‍ നിന്നും പുറത്താകുന്നത്. നാഷണല്‍ യൂത്ത് ഐക്കണ്‍ അവാര്‍ഡ് കമ്മിറ്റിയുടെ ഗ്ലോബല്‍ യൂത്ത് ഐക്കണ്‍ അവാര്‍ഡ് റോബിനാണ് ലഭിച്ചത്. കൗമുദി ചാനലിലെ ചാറ്റ് വിത്ത് ഡോക്ടര്‍ മച്ചാന്‍ എന്ന ഷോയിലൂടെയും മലയാളികള്‍ക്ക് പരിചിതനാണ് റോബിന്‍. റോബിന്റെ ഏറെനാളത്തെ ആഗ്രഹമാണ് ഒരു സിനിമയില്‍ അഭിനയിക്കുക എന്നുള്ളത്. തന്റെ അഭിമുഖങ്ങളിലെല്ലാം റോബിന്‍ ഇത് തുറന്ന് പറഞ്ഞിട്ടുണ്ട്. ഇതിനെത്തുടര്‍ന്നാണ് സന്തോഷ് ടി. കുരുവിള റോബിനെ കാണുന്നതും തന്റെ പുതിയ സിനിമയിലേയ്ക്ക് നേരിട്ട് കാസ്റ്റ് ചെയ്യുന്നതും. സംവിധായകരെയടക്കം വരും ദിവസങ്ങളില്‍ പ്രഖ്യാപിക്കുമെന്നും സന്തോഷ് കാന്‍ ചാനലിനോട് പറഞ്ഞു.
‘ഡാ തടിയാ’, ‘മഹേഷിന്റെ പ്രതികാരം’, ‘മായാനദി’, ‘ആന്‍ഡ്രോയ്ഡ് കുഞ്ഞപ്പന്‍’ എന്നീ ജനപ്രിയ ചിത്രങ്ങള്‍ പ്രേക്ഷകര്‍ക്ക് സമ്മാനിച്ച നിര്‍മ്മാതാവാണ് സന്തോഷ് ടി കുരുവിള. മൂണ്‍ ഷോട്ട് എന്റര്‍ടൈന്മെന്റ്‌സ്, ഒപിഎം സിനിമാസ്, എസ് ടി കെ ഫ്രെയിംസ് എന്നീ ബാനറുകളിലായി ഇതിനോടകം 13 ചിത്രങ്ങള്‍ അദ്ദേഹം നിര്‍മ്മിച്ചിട്ടുണ്ട്. എസ്ടി കെ ഫ്രെയിംസിന്റെ ബാനറില്‍ നിര്‍മ്മിക്കുന്ന 14-ാമത്തെ ചിത്രമായിരിക്കും ഇത്. ‘ന്നാ താന്‍ കേസ് കൊട്’ എന്ന കുഞ്ചാക്കോ ബോബന്‍ ചിത്രമാണ് റിലീസിനൊരുങ്ങി നില്‍ക്കുന്ന അദ്ദേഹത്തിന്റെ മറ്റൊരു ചിത്രം.
Recent Comments