വിജയ് അഭിനയിച്ച് നെല്‍സണ്‍ സംവിധാനം ചെയ്ത ഏറ്റവും ഒടുവില്‍ റിലീസ് ചെയ്ത ബീസ്റ്റ് വിജയ് ആരാധകരെപ്പോലും നിരാശപ്പെടുത്തിയ ചിത്രമായിരുന്നു. സമൂഹമാധ്യമങ്ങളില്‍ ചിത്രത്തിനെതിരെയുള്ള ട്രോളുകള്‍ ഏറെ വൈറലായിരുന്നു.
ബീസ്റ്റിന് ശേഷം ദളപതി 66 എന്ന പേരില്‍ അനൗണ്‍സ് ചെയ്ത പുതിയ ചിത്രത്തിന്റെ സംവിധായകന്‍ തെലുങ്ക് സിനിമയിലെ ഹിറ്റ്‌മേക്കറായ വംസി പൈഡിപ്പള്ളിയാണ്. അതുകൊണ്ടുതന്നെ ചിത്രം തമിഴിലും തെലുങ്കിലുമായി ചിത്രികരണം നടന്നുവരുന്നു. വിജയ് യുടെ ജന്മദിനത്തോടനുബന്ധിച്ച് ചിത്രത്തിന്റെ ടൈറ്റില്‍- വാരിസ് ചിത്രത്തിന്റെ അണിയറക്കാര്‍ പുറത്തുവിട്ടു. ബീസ്റ്റിന്റെ തോല്‍വിയില്‍ നിരാശരായ വിജയ് ആരാധകര്‍ തങ്ങളുടെ ദളപതിയുടെ പുതിയ ചിത്രം വാരിസ് വന്‍ വിജയമാകുമെന്ന പ്രതീക്ഷയിലാണ്. ഇപ്പോഴിതാ ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പുറത്തിറങ്ങി നിമിഷങ്ങള്‍ക്കുള്ളില്‍ സോഷ്യല്‍മീഡിയയില്‍ അതിനെതിരെ ട്രോളുകള്‍കൊണ്ട് നിറയുകയാണ്. ‘കഥയും മറ്റും സിനിമയ്ക്കുവേണ്ടി കോപ്പി ചെയ്യുന്നത് കണ്ടിട്ടുണ്ട്. പക്ഷേ ഒരു പോസ്റ്ററിനുവേണ്ടി കോപ്പിയടിക്കേണ്ട ഗതികേടിലായോ തമിഴ് സിനിമ’ എന്നതാണ് ട്രോളുകളില്‍ പറയുന്നത്. ഇതിന് കാരണം മറ്റൊന്നുമല്ല, തമിഴകത്തെ പ്രമുഖ വസ്ത്രനിര്‍മ്മാണ സ്ഥാപനമായ ഓട്ടോയുടെ (OTTO) പരസ്യപോസ്റ്ററിന്റെ അനുകരണമാണ് വിജയ് യുടെ വാരിസിന്റെ ഫസ്റ്റ് ലുക്ക് പോസ്റ്റര്‍ എന്നാണ് ആക്ഷേപം. ദുല്‍ഖര്‍ സല്‍മാനാണ് ഓട്ടോയ്ക്കുവേണ്ടി പരസ്യത്തില്‍ പോസ്സ് ചെയ്തിരിക്കുന്നത്. ഓട്ടോയുടെ ബ്രാന്റ് അംബാസഡര്‍ കൂടിയാണ് ദുല്‍ഖര്‍.
ഓട്ടോയുടെ പരസ്യചിത്രത്തില്‍ ദുല്‍ഖര്‍ ഇരിക്കുന്ന അതേ പോസ്സിലാണ് വിജയ് യും വാരിസിന്റെ ഫസ്റ്റ് ലുക്ക് പോസ്റ്ററില്‍ പ്രത്യക്ഷപ്പെടുന്നുവെന്നതാണ് ആക്ഷേപം. സമൂഹമാധ്യമങ്ങളിലും മറ്റും ഈ ചിത്രങ്ങള്‍ ഷെയര്‍ ചെയ്ത് വാരിസിനെ ഡീഗ്രേഡ് ചെയ്യാനാണ് ചിലര്‍ ശ്രമിക്കുന്നതെന്ന് ചിത്രത്തിന്റെ നിര്‍മ്മാതാക്കള്‍ അറിയിച്ചു. എന്നാല്‍ ഇതൊന്നുമല്ല സത്യം. ഓട്ടോ കമ്പനി തന്നെ തങ്ങളുടെ സോഷ്യല്‍ മീഡിയ അക്കൗണ്ട് വഴി ഇതിന്റെ യാഥാര്‍ത്ഥ്യം പറയുകയുണ്ടായി. തങ്ങള്‍ക്ക് ദുല്‍ഖറിന്റെ ഈ രീതിയിലുള്ള ഒരു ഷൂട്ടിംഗ് നടന്നിട്ടില്ലെന്നും ഇത് വിജയ് യുടെതന്നെ പടത്തില്‍ ദുല്‍ഖറിന്റെ തലവച്ച് ഗ്രാഫിക്‌സിലൂടെ സൃഷ്ടിച്ചെടുത്തതാണെന്നും തമാശയ്ക്കുവേണ്ടി ആരോ ഒപ്പിച്ച പണിയാണിതെന്നും അവര്‍ ആരോപിക്കുന്നു. തീര്‍ച്ചയായും വിജയ് യുടെ ചിത്രം ഓട്ടോയുടെ അനുകരണമല്ല, വാരിസിനും അതിന്റെ അണിയറക്കാര്‍ക്കും എല്ലാവിധ ആശംസകളും നേരുന്നു.
ഓട്ടോ കമ്പനിയുടെ ഈ വെളിപ്പെടുത്തല്‍ തല്‍ക്കാലം ഈ വിവാദങ്ങള്‍ക്ക് നാന്ദി കുറിച്ചു. ഒപ്പം വിജയ് യുടെ ആരാധകര്‍ക്ക് ട്രോളില്‍നിന്നുള്ള ആശ്വാസവും.
Recent Comments