ഫെഫ്ക ഡയറക്ടേഴ്‌സ് യൂണിയന്റെ ധനശേഖരണാര്‍ത്ഥം നിര്‍മ്മിക്കുന്ന ചിത്രം ജീത്തു ജോസഫ് സംവിധാനം ചെയ്യും. പൃഥ്വിരാജാണ് നായകന്‍. ഫെഫ്കയുടെ ജനറല്‍ സെക്രട്ടറി ബി. ഉണ്ണികൃഷ്ണന്‍ ഇതുസംബന്ധിച്ച ഔദ്യോഗിക പ്രഖ്യാപനം ഇന്നലെ നടത്തി.
ചിത്രം നിര്‍മ്മിക്കുന്നത് ചെന്നൈ സ്വദേശിയായ രമേഷ് പി. പിള്ളയാണ്. ആദ്യ ഗഡുവായ 25 ലക്ഷം രൂപ രമേഷ്പിള്ള ഫെഫ്ക ഡയറക്ടേഴ്‌സ് യൂണിയന്‍ പ്രസിഡന്റ് രഞ്ജിപണിക്കര്‍ക്ക് കൈമാറി.
ഇതും ഒരു ത്രില്ലര്‍ ചിത്രമാണ്. കഥയും കഥാപാത്രവും സംബന്ധിച്ച സൂചനകള്‍ ജീത്തു പൃഥ്വിയുമായി സംസാരിച്ചിരുന്നു. അടുത്ത വര്‍ഷം ചിത്രത്തിന്റെ ഷൂട്ടിംഗ് നടക്കും. മെമ്മറീസും ഊഴവുമാണ് ജീത്തു പൃഥ്വിയെവച്ച് ചെയ്ത മറ്റ് ചിത്രങ്ങള്‍.
നിലവില്‍ ഫെഫ്ക റൈറ്റേഴ്‌സ് യൂണിയനുവേണ്ടി ഷാജി കൈലാസ് സംവിധാനം ചെയ്യുന്ന കാപ്പയില്‍ അഭിനയിക്കുന്നതും പൃഥ്വിരാജാണ്.
Recent Comments