സജിമോന്‍ പ്രഭാകറിന്റെ സംവിധാനത്തില്‍ ഫഹദ് ഫാസിലിനെ നായകനാക്കി ഒരുക്കുന്ന പുതിയ ചിത്രമാണ് മലയന്‍കുഞ്ഞ്. കഴിഞ്ഞ ദിവസമാണ് ചിത്രത്തിലെ ‘ചോലപ്പെണ്ണേ’ എന്നാരംഭിക്കുന്ന ഗാനം പുറത്ത് വന്നത്. എ.ആര്‍. റഹ്‌മാന്‍ സംഗീതം ഒരുക്കി വിജയ് യേശുദാസ് ആലപിച്ച ഈ ഗാനം ഹിറ്റ് ചാര്‍ട്ടില്‍ ഇടം നേടിയിരിക്കുകയാണ്. ഗ്രാമത്തിലെ ഒരു വിവാഹ വീടിന്റെ പശ്ചാത്തലത്തിലാണ് പാട്ട് ഒരുക്കിയിരിക്കുന്നത്. തനി നാടന്‍ ശൈലിയിലുള്ള ഈ ഗാന രംഗത്തില്‍ വധുവായി രജീഷാവിജയന്‍ എത്തുന്നു. പാട്ടിലുടനീളം ഫഹദ് ഫാസിലിനെയും കാണാന്‍ സാധിക്കും.
ഫാസില്‍ നിര്‍മ്മിക്കുന്ന ചിത്രത്തിന്റെ തിരക്കഥ ഒരുക്കിയത് മഹേഷ് നാരായണനാണ്. ചിത്രം ജൂലൈ 22 ന് തിയേറ്ററില്‍ എത്തും. ഇന്ദ്രന്‍സ്, ജാഫര്‍ ഇടുക്കി, അര്‍ജുന്‍ അശോകന്‍, ദീപക് പരമ്പോള്‍ എന്നിവരും ചിത്രത്തില്‍ അഭിനയിക്കുന്നു. ഛായാഗ്രഹണവും മഹേഷ് നാരായണന്‍ കൈകാര്യം ചെയ്യുന്നു.
30 വര്‍ഷങ്ങള്‍ക്കുശേഷം എ.ആര്‍. റഹ്‌മാന്‍ സംഗീതം ഒരുക്കുന്ന മലയാള ചിത്രം എന്ന പ്രത്യേകതയും മലയന്‍കുഞ്ഞിനുണ്ട്. നീണ്ട ഇടവേളക്ക് ശേഷം റഹ്‌മാന്‍ ഒരുക്കിയ മലയാള തനിമയുള്ള ഈ ഗാനം പ്രേക്ഷകര്‍ ഇരുകൈയും നീട്ടി സ്വീകരിച്ചിരിക്കുകയാണ്. പൃഥ്വിരാജ് നായകനാകുന്ന ആടുജീവിതത്തിലും എ.ആര്‍. റഹ്‌മാന്‍ തന്നെയാണ് സംഗീതം ഒരുക്കുന്നത്.
Recent Comments