സൂഫിയും സുജാതയും എന്ന ചിത്രത്തിലൂടെ ശ്രദ്ധേയനായ നടനാണ് ദേവ് മോഹന്‍. ദേവ് മോഹന്‍ അഭിനയിക്കുന്ന തെലുങ്ക് ചിത്രമാണ് ശാകുന്തളം. ചിത്രത്തില്‍ ദുഷ്യന്തനായിട്ടാണ് ദേവ് മോഹന്‍ അഭിനയിക്കുന്നത്. ദേവ് മോഹന്റെ ജന്മദിനത്തോടനുബന്ധിച്ച് ചിത്രത്തിന്റെ ടൈറ്റില്‍ പോസ്റ്ററും അണിയറപ്രവര്‍ത്തകര്‍ പുറത്ത് വിട്ടിട്ടുണ്ട്. ‘നമ്മുടെ സുന്ദരനും ധീരനുമായ ദുഷ്യന്ത് മഹാ രാജാവിന് ജന്മദിനാശംസകള്‍ നേരുന്നു’വെന്നാണ് ശാകുന്തളം ടീം പുറത്തുവിട്ട പോസ്റ്ററിലുള്ളത്.
കാളിദാസന്റെ ക്ലാസിക്കല്‍ കൃതിയായ ശാകുന്തളം അടിസ്ഥാനമാക്കിയാണ് ചിത്രം ഒരുക്കുന്നത്. ഗുണശേഖര്‍ തിരക്കഥയെഴുതി സംവിധാനം ചെയ്യുന്ന ചിത്രത്തില്‍ ദേവ് മോഹനെ കൂടാതെ സാമന്ത റൂത്ത് പ്രഭു, മധുബാല, മോഹന്‍ ബാബു, സച്ചിന്‍ ഖേദ്ക്കര്‍, ഗൗതമി, അദിതി ബാലന്‍, അനന്യ നാഗല്ല, കബീര്‍ ബേദി, അല്ലു അര്‍ഹ എന്നിവരും അഭിനയിക്കുന്നു. ഛായാഗ്രഹണം ശേഖര്‍ വി. ജോസഫ്. ദില്‍ രാജു അവതരിപ്പിക്കുന്ന ‘ശാകുന്തളം’ നീലിമ ഗുണ നിര്‍മ്മിക്കുന്നു. സംഗീതം മണി ശര്‍മ്മ, കല-അശോക്, പിആര്‍ഒ ശബരി.
Recent Comments