ഹരീഷ് പേരടി നിര്‍മ്മാതാവാകുന്ന ചിത്രത്തിന്റെ ടൈറ്റില്‍ പോസ്റ്റര്‍ ലോഞ്ച് ഇന്ന് കോഴിക്കോട് നടന്നു. ദാസേട്ടന്റെ സൈക്കിള്‍ എന്നാണ് ചിത്രത്തിന്റെ പേര്. അഖില്‍ കാവുങ്കല്‍ തിരക്കഥയെഴുതി സംവിധാനം ചെയ്യുന്ന ചിത്രത്തില്‍ ടൈറ്റില്‍ ക്യാരക്ടറിനെ അവതരിപ്പിക്കുന്നതും ഹരീഷ് പേരടിയാണ്. ചിത്രത്തിന്റെ ഷൂട്ടിംഗ് കോഴിക്കോട് ആരംഭിച്ചു.
‘ഐസ് ഒരതിയുടെ സംവിധായകനാണ് അഖില്‍ കാവുങ്കല്‍. ആ ചിത്രത്തിലെ കേന്ദ്ര കഥാപാത്രത്തെ അവതരിപ്പിച്ചതും ഞാനായിരുന്നു. അടുത്തിടെ നല്ല കഥയുമായി അഖില്‍ എന്നെ കാണാന്‍ വന്നിരുന്നു. അപ്പോഴാണ് അത് സ്വന്തമായി നിര്‍മ്മിക്കാം എന്ന ആലോചനയും ഉണ്ടാകുന്നത്. ചെറിയ ബഡ്ജറ്റില്‍ ഒരു നല്ല ചിത്രം. അതാണ് ലക്ഷ്യം. എന്നോടൊപ്പം ബിന്ദുവും സുദീപ് പച്ചാട്ടും നിര്‍മ്മാണ പങ്കാളികളാണ്. നൗഫല്‍ പുനത്തിലാണ് എക്‌സിക്യൂട്ടീവ് പ്രൊഡ്യൂസര്‍.’ ഹരീഷ് പേരടി കാന്‍ ചാനലിനോട് പറഞ്ഞു.
‘സിനിമയുടെ പേരുപോലെതന്നെ ദാസേട്ടന്റെ ജീവിതം പറയുന്ന കഥയാണിത്. വളരെ പച്ചയായ മനുഷ്യനാണ് ദാസേട്ടന്‍. ദാസിനെ അവതരിപ്പിക്കുന്നതും ഞാനാണ്. വേറെയും നല്ല അഭിനേതാക്കള്‍ ചിത്രത്തിലുണ്ട്. അവരെല്ലാം നാടകരംഗത്തുള്ളവരാണ്. രാഹുല്‍ സി. വിമലയാണ് ഛായാഗ്രാഹകന്‍. തോമസ് ഹാന്‍സ് ബെന്നിന്റെ വരികള്‍ക്ക് ഈണം പകരുന്നത് എ.സി. ഗിരീശന്‍ ആണ്. നിജില്‍ ദിവാകരനാണ് പ്രൊഡക്ഷന്‍ കണ്‍ട്രോളര്‍.’
Recent Comments