മോഹന്‍ലാലിനെ നായകനാക്കി വൈശാഖ് സംവിധാനം ചെയ്ത മോണ്‍സ്റ്റര്‍ ഒക്ടോബര്‍ 21 ന് തീയേറ്ററുകളില്‍ പ്രദര്‍ശനത്തിനെത്തും. ആശിര്‍വാദ് സിനിമാസാണ് ഇത് സംബന്ധിച്ച ഔദ്യോഗിക സ്ഥിരീകരണം കാന്‍ ചാനലിന് നല്‍കിയത്. ആശിര്‍വാദ് സിനിമാസ് നിര്‍മ്മിക്കുന്ന മുപ്പതാമത്തെ ചിത്രമാണ് മോണ്‍സ്റ്റര്‍.
ഈ കോവിഡ് കാലത്താണ് മോണ്‍സ്റ്ററിന്റെ ഷൂട്ടിംഗ് എറണാകുളത്ത് ആരംഭിച്ചത്. തീയേറ്ററുകളില്‍നിന്ന് ആളുകള്‍ വിട്ടുനിന്നിരുന്ന സമയമായതിനാല്‍ ഒടിടി റിലീസിനുവേണ്ടി നിര്‍മ്മിച്ച ചിത്രമായിരുന്നു ഇത്. നിലവില്‍ കൂടുതല്‍ ചിത്രങ്ങള്‍ തീയേറ്ററുകളില്‍ പ്രദര്‍ശനത്തിനെത്തുകയും, ആളുകള്‍ കൂടുതല്‍ സജീവമാവുകയും ചെയ്ത സാഹചര്യത്തിലാണ് മോണ്‍സ്റ്റര്‍ തീയേറ്റര്‍ റിലീസ് ചെയ്യാന്‍ തീരുമാനിച്ചിരിക്കുന്നത്. ബി. ഉണ്ണികൃഷ്ണന്‍ സംവിധാനം ചെയ്ത ആറാട്ടിനുശേഷം തീയേറ്റര്‍ റിലീസ് ആകുന്ന മോഹന്‍ലാല്‍ ചിത്രംകൂടിയാണ് മോണ്‍സ്റ്റര്‍. ജീത്തുജോസഫിന്റെ ദൃശ്യം 2, ട്വല്‍ത്ത് മാന്‍, പൃഥ്വിരാജിന്റെ ബ്രോഡാഡി എന്നിവ ഒടിടി റിലീസായിരുന്നു.
പ്രശസ്ത തെലുങ്ക് നടന്‍ മോഹന്‍ബാബുവിന്റെ മകള്‍ ലക്ഷ്മി മഞ്ചുവും ചിത്രത്തില്‍ ശ്രദ്ധേയമായൊരു വേഷം ചെയ്യുന്നു. സിദ്ധിക്ക്, ജോണി ആന്റണി, കോട്ടയം രമേഷ്, സുദേവ് നായര്‍, ഗണേഷ് കുമാര്‍ തുടങ്ങിയവരും ചിത്രത്തില്‍ അഭിനയിക്കുന്നു. ഉദയകൃഷ്ണയാണ് മോണ്‍സ്റ്ററിന്റെ കഥാകാരന്‍. സതീഷ് കുറുപ്പ് ഛായാഗ്രഹണം നിര്‍വ്വഹിച്ചിരിക്കുന്നു.
Recent Comments