കടുവയ്ക്കുശേഷം പൃഥ്വിരാജിനെ നായകനാക്കി ഷാജി കൈലാസ് സംവിധാനം ചെയ്യുന്ന ചിത്രമാണ് കാപ്പ. പൃഥ്വിരാജിന്റെ പിറന്നാള്‍ ദിനത്തോടനുബന്ധിച്ചാണ് കാപ്പിയുടെ ടീസര്‍ അണിയറക്കാര്‍ പുറത്തുവിട്ടിരിക്കുന്നത്. ‘ഒറ്റയ്ക്ക് അടിച്ച് തന്നെയാടാ ഇവിടംവരെ എത്തിയത്’ എന്ന പൃഥ്വിരാജിന്റെ മാസ് ഡയലോഗും ആക്ഷന്‍ രംഗങ്ങളും നിറച്ച ടീസറാണ് പുറത്തിറങ്ങിയത്. അപര്‍ണ ബാലമുരളിയാണ് നായിക. ആസിഫ് അലി മറ്റൊരു പ്രധാന കഥാപാത്രമാകുന്നുണ്ട്.
ജി.ആര്‍. ഇന്ദുഗോപന്‍ രചിച്ച ശംഖുമുഖി എന്ന നോവലിനെ ആസ്പദമാക്കി ഇന്ദുഗോപന്‍ തന്നെ തിരക്കഥയെഴുതിയ ചിത്രമാണ് കാപ്പ. തീയേറ്റര്‍ ഓഫ് ഡ്രീംസ്, ഫെഫ്ക റൈറ്റേഴ്‌സ് യൂണിയനും ചേര്‍ന്നാണ് നിര്‍മ്മിക്കുന്നത്. ജിനു എബ്രഹാം, ഡോള്‍വിന്‍ കുര്യാക്കോസ്, ദിലീഷ് നായര്‍ എന്നിവരാണ് തീയേറ്റര്‍ ഓഫ് ഡ്രീംസിന്റെ സാരഥികള്‍. തിരുവനന്തപുരമാണ് പ്രധാന ലൊക്കേഷന്‍.
വിലായത്ത് ബുദ്ധ, സലാര്‍, കാപ്പ, കാളിയന്‍, ആടുജീവിതം, എമ്പുരാന്‍ എന്നിവയാണ് പൃഥ്വിയുടേതായി അണിയറയില്‍ ഒരുങ്ങുന്ന ചിത്രങ്ങള്‍.
Recent Comments