കഴിഞ്ഞ ദിവസം നടി ജ്യോതിക തന്റെ ഇന്‍സ്റ്റഗ്രാമില്‍ ഒരു വീഡിയോ പങ്കുവച്ചിരുന്നു. ചെന്നൈയിലെ പ്രശസ്തമായ മഹേഷ് ഫിറ്റനസ് ക്ലബ്ബില്‍ അവര്‍ നടത്തുന്ന അതികഠിനമായ വ്യായാമ മുറകളുടെ കട്ട് ഷോട്ടുകളായിരുന്നു ആ വീഡിയോയില്‍ ഉണ്ടായിരുന്നത്. ഈ ജന്മദിനം ആരോഗ്യപരിപാലനത്തിനായി എന്നെ സമര്‍പ്പിക്കുന്നുവെന്നാണ് ജ്യോതിക പറഞ്ഞിരിക്കുന്നത്.
ഒക്ടോബര്‍ 18 നായിരുന്നു ജ്യോതികയുടെ ജന്മദിനം. അതിനു പിന്നാലെയാണ് അവര്‍ ഫിറ്റ്‌നസ് ക്ലബ്ബില്‍ അംഗത്വം നേടിയിരിക്കുന്നതും. പ്രശസ്ത ഫിസിക്കല്‍ ട്രെയിനറായ മഹേഷ് ഘനേക്കറുടെ കീഴിലാണ് പരിശീലനം.
‘പ്രായമെന്നെ മാറ്റാന്‍ അനുവദിക്കില്ല, ഞാന്‍ പ്രായത്തെ മാറ്റും’ എന്ന അടിക്കുറിപ്പോടെയാണ് അവര്‍ ആ വീഡിയോ പങ്കുവച്ചിരിക്കുന്നതും.
ഏറ്റവും ഒടുവില്‍ മമ്മൂട്ടിയോടൊപ്പം കാതല്‍ എന്ന ചിത്രത്തില്‍ അഭിനയിക്കാന്‍ ഒരുങ്ങുകയാണ് ജ്യോതിക. നീണ്ട പതിമൂന്ന് വര്‍ഷത്തിനുശേഷമാണ് അവര്‍ മലയാളസിനിമയില്‍ അഭിനയിക്കുന്നത്. പ്രിയദര്‍ശന്റെ രാക്കിളിപ്പാട്ടും ടി.കെ. രാജീവ് കുമാറിന്റെ സീതാ കല്യാണവുമാണ് അവര്‍ ഇതിനുമുമ്പ് അഭിനയിച്ച മലയാള ചിത്രങ്ങള്‍.
2006 സെപ്തംബര്‍ 11 നായിരുന്നു ജ്യോതിക-സൂര്യ വിവാഹം. ദിയ, ദേവ് ഇവര്‍ മക്കളാണ്. വിവാഹശേഷം ചുരുക്കം ചില ചിത്രങ്ങളിലാണ് ജ്യോതിക അഭിനയിച്ചിട്ടുള്ളത്. 36 വയതിനിലെ, ചെക്ക ചിവന്ത വാനം, കാട്രിന്‍ മൊഴി, രാക്ഷസി, തമ്പി എന്നിവ അതില്‍ ചിലതാണ്. സെലക്ടീവ് വേഷങ്ങളേ ചെയ്യൂവെന്ന് അവര്‍ മുമ്പ് പ്രഖ്യാപിച്ചുകഴിഞ്ഞതാണ്. മലയാളത്തില്‍നിന്ന് അങ്ങനെയൊരു വേഷം വന്നതുകൊണ്ട് മാത്രമാണ് അവര്‍ കാതല്‍ കമ്മിറ്റ് ചെയ്തതും. മമ്മൂട്ടിക്കൊപ്പവും ജ്യോതിക ഇതാദ്യമാണ്.
തന്റെ കരിയറിന് മികച്ച കായികക്ഷമതകൂടി ആവശ്യമാണെന്ന ബോധ്യമാണ് അവരെ മഹേഷ് ഫിറ്റ്‌നസ് ക്ലബ്ബില്‍ എത്തിച്ചിരിക്കുന്നതും.
Recent Comments