ഉണ്ണി മുകുന്ദനെ നായകനാക്കി വിഷ്ണുമോഹന് സംവിധാനം ചെയ്ത ചിത്രമായിരുന്നു മേപ്പടിയാന്‍. ഉണ്ണിമുകുന്ദന്‍ ഫിലിംസിന്റെ ബാനറില്‍ ഉണ്ണിമുകുന്ദന്‍ നിര്‍മ്മിച്ച ആദ്യ ചിത്രംകൂടിയാണിത്. ബോക്‌സ് ഓഫീസില്‍ വന്‍ ഹിറ്റ് നേടിയ മേപ്പടിയാന്‍ അന്തര്‍ദ്ദേശീയ ചലച്ചിത്ര മേളകളിലടക്കം നിരവധി പുരസ്‌കാരങ്ങളും സ്വന്തമാക്കിയിരുന്നു. മേപ്പടിയാന്റെ ഈ അത്യുജ്ജ്വല വിജയത്തിന് പിന്നില്‍ പ്രവര്‍ത്തിച്ച സംവിധായകന് വിഷ്ണുമോഹന് ആഡംബര കാറായ മെഴ്സിഡസ് ബെന്‍സ് ജി ക്ലാസ് സമ്മാനമായി നല്‍കിയിരിക്കുകയാണ് ഉണ്ണി മുകുന്ദന്‍. കൊച്ചിയിലെ റോയല്‍ ഡ്രൈവ് ഷോറൂമില്‍ നടന്ന ചടങ്ങില്‍ ഉണ്ണി മുകുന്ദന്‍ വിഷ്ണു മോഹന് കാറിന്റെ താക്കോല്‍ കൈമാറി. ആഡംബര കാറുകളുടെയും പ്രി ഓണ്‍ഡ് എസ്യുവികളുടെയും കേരളത്തിലെ വിതരണക്കാരാണ് റോയല്‍ ഡ്രൈവ്.
നീതി ബോധവും സുതാര്യതയും നഷ്ടമായ ആര്‍ത്തി നിറഞ്ഞ സാമൂഹിക ചുറ്റുപാടുകളില്‍ സാധാരണക്കാരനായ ഒരാളുടെ ജീവിതം തകരുന്ന കഥ പറയുന്ന മേപ്പടിയാന്‍ 2022 ജനുവരി 14-നാണ് റീലീസ് ചെയ്തത്. സൈജു കുറുപ്പ്, അജു വര്‍ഗീസ്, ഇന്ദ്രന്‍സ്, അഞ്ജു കുര്യന്‍, നിഷ സാരംഗ്, ശങ്കര്‍ രാമകൃഷ്ണന്‍ തുടങ്ങിയവരായിരുന്നു ചിത്രത്തിലെ താരങ്ങള്‍. മേപ്പടിയാന്റെ കഥയും വിഷ്ണുമോഹന്റേതായിരുന്നു.
Recent Comments