കഴിഞ്ഞ കുറേ മണിക്കൂറുകളായി നിരവധി ഫോണ്‍കോളുകളാണ് നടന്‍ ഉണ്ണി മുകുന്ദനെ തേടിയെത്തിക്കൊണ്ടിരിക്കുന്നത്. മലയാള സിനിമയിലെ മുന്‍നിര താരങ്ങളും സാങ്കേതിക പ്രവര്‍ത്തകരും നിര്‍മ്മാതാക്കളും വിതരണക്കാരുമടക്കം അക്കൂട്ടത്തിലുണ്ടായിരുന്നു.
കഴിഞ്ഞ ദിവസമാണ് ഉണ്ണിമുകുന്ദന്‍ നായകനായി അഭിനയിക്കുന്ന ഷെഫീക്കിന്റെ സന്തോഷം എന്ന സിനിമയുടെ ട്രെയിലര്‍ പുറത്തിറങ്ങിയത്. ഇറങ്ങി മണിക്കൂറുകള്‍ക്കകം ട്രെയിലര്‍ ട്രെന്‍ഡിംഗായി. അത് കണ്ടിട്ടാണ് എല്ലാവരും വിളിക്കുന്നത്.
എല്ലാവര്‍ക്കും നല്ലത് മാത്രമേ പറയാനുള്ളൂ. ഒരു മികച്ച ചിത്രത്തിന്റെ സൂചനകളാണ് ട്രെയിലര്‍ നല്‍കുന്നതെന്ന് ചിലര്‍ നിസ്സംശയം പറഞ്ഞു. മറ്റു ചിലര്‍ ഉണ്ണിമുകുന്ദന്റെ പ്രകടനത്തെയാണ് എടുത്ത് പറഞ്ഞത്. ചിത്രത്തിലെ കഥാപാത്രങ്ങളെല്ലാം ഒന്നിനൊന്ന് നന്നായിട്ടുണ്ടെന്ന് ഇനിയും ചിലര്‍ അഭിപ്രായപ്പെട്ടു. അടുത്തെങ്ങും തന്നെത്തേടി ഇത്രയുമധികം ഫോണ്‍കോളുകള്‍ എത്തിയിട്ടില്ലെന്ന് ഉണ്ണി മുകുന്ദനും സമ്മതിക്കുന്നു. ‘ഷെഫീക്കിന് സര്‍വ്വ സ്വീകാര്യത ലഭിച്ചതില്‍ സന്തോഷമുണ്ട്.’ ഉണ്ണി പറഞ്ഞു.
ഉണ്ണിമുകുന്ദന്‍ ആദ്യം നിര്‍മ്മിച്ച ചിത്രം മേപ്പടിയാന്‍, ഒരു ത്രില്ലര്‍ ഗണത്തില്‍ പെടുത്താവുന്ന സിനിമയായിരുന്നു. ഉണ്ണിമുകുന്ദന്‍ എന്ന മാസ്സ് ഹീറോയുടെ ആക്ഷന്‍ രംഗങ്ങളൊന്നും അതില്‍ ഉണ്ടായിരുന്നില്ല. എന്നിട്ടും സിനിമയുടെ രണ്ടാം പകുതി ത്രില്ലടിച്ചിരുന്നാണ് പ്രേക്ഷകര്‍ കണ്ടത്. ഷെഫീക്കിന്റെ സന്തോഷം പക്ഷേ ഒരു ഫീല്‍ഗുഡ് മൂവിയുടെ പ്രതീതി ഉണര്‍ത്തുന്നു. പ്രണയവും നര്‍മ്മവും ഇമോഷനുമൊക്കെ ഇഴപിരിഞ്ഞൊരു ചലച്ചിത്രം. ചിത്രം തീയേറ്ററുകളിലെത്താന്‍ ഇനി മൂന്ന് ദിവസം മാത്രം ശേഷിക്കെ ഷെഫീക്കിന്റെ അണിയറപ്രവര്‍ത്തകരും പ്രതീക്ഷയിലാണ്.
ഇതിനിടെ ചിത്രത്തിലെ മറ്റൊരു ശക്തമായൊരു കഥാപാത്രത്തെ അവതരിപ്പിച്ച ബാലയെ രമേഷ് പിഷാരടി അദ്ദേഹത്തിന്റെ വീട്ടിലെത്തി കണ്ടു. സംവിധായകന്‍ അനൂപ് പന്തളവും ഒപ്പമുണ്ടായിരുന്നു. ചിത്രത്തിലെ ചില രംഗങ്ങളും രമേഷിന് കാണിച്ചുകൊടുത്തു. പ്രതീക്ഷയുണര്‍ത്തുന്ന ചിത്രമെന്നാണ് രമേഷ് പിഷാരടി പിന്നീട് തന്റെ ഫെയ്‌സ്ബുക്കില്‍ കുറിച്ചത്.
Recent Comments