വിഷ്ണു വിശാലിനെയും ഐശ്വര്യ ലക്ഷ്മിയെയും കേന്ദ്ര കഥാപാത്രങ്ങളാക്കി ചെല്ലാ അയ്യാവു സംവിധാനം ചെയ്ത ചിത്രമാണ് ‘ഗട്ടാ ഗുസ്തി’. ഇതൊരു സ്‌പോര്‍ട്‌സ് ഡ്രാമാ ആക്ഷന്‍ ചിത്രമാണ്. ചിത്രത്തിന്റെ പ്രൊമോഷന്റെ ഭാഗമായി കഴിഞ്ഞ ദിവസം വിഷ്ണു വിശാലും ഐശ്വര്യ ലക്ഷ്മിയും കേരളത്തില്‍ എത്തിയിരുന്നു. എറണാകുളം ‘ഹോളിഡേ ഇന്‍’ ഹോട്ടലില്‍ വെച്ച് നടന്ന പ്രസ്സ് മീറ്റില്‍ സംസാരിക്കവെ വിശാല്‍ പറഞ്ഞു.
‘ഞാന്‍ കണ്ടന്റ് ഓറിയന്റായിട്ടുള്ള സിനിമകളാണ് ചെയ്തിട്ടുള്ളത്. അതുകൊണ്ടുതന്നെ എന്റെ സിനിമകളില്‍ പ്രേക്ഷകര്‍ കണ്ടന്റ് പ്രതീക്ഷിക്കുന്നുണ്ട്. ‘ഗട്ടാ ഗുസ്തി’ ഒരു ഫാമിലി എന്റര്‍ടെയിനറാണ്. സ്ത്രീയും പുരുഷനും സമമാണ് എന്ന ആശയമാണ് ചിത്രം പങ്കുവയ്ക്കുന്നത്. ഗുസ്തിയെ ആധാരമാക്കി ഒരുക്കിയ ചിത്രത്തില്‍ വീരയായി ഞാനും കീര്‍ത്തിയായി ഐശ്വര്യയും എത്തുന്നു. വീരയുടെയും കീര്‍ത്തിയുടെയും വിവാഹശേഷം, അവര്‍ക്കിടയില്‍ നടക്കുന്ന സംഘര്‍ഷങ്ങളാണ് ചിത്രം സംസാരിക്കുന്നത്. വലിയ ട്വിസ്റ്റുകള്‍ ഉള്ള സിനിമ അല്ല. എന്നാല്‍ ചില സര്‍പ്രൈസുകള്‍ ചിത്രത്തിലുടനീളം കാണാം.’
‘ഒരുപാട് നല്ല സിനിമകളുടെ ഭാഗമാവാന്‍ എനിക്ക് ഭാഗ്യം ലഭിച്ചിട്ടുണ്ട്. ‘ഗട്ടാ ഗുസ്തി’ എനിക്കത്യാവശ്യം പെര്‍ഫോം ചെയ്യാന്‍ സാധിച്ച സിനിമയാണ്. കീര്‍ത്തിയെ നന്നായി അവതരിപ്പിച്ചുവെന്നുതന്നെയാണ് ഞാന്‍ വിശ്വസിക്കുന്നത്. ചിത്രത്തിന്റെ പ്രൊഡ്യൂസര്‍ കൂടെയായ വിഷ്ണുവാണ് എനിക്ക് ഈ കഥാപാത്രത്തെ നല്‍കിയത്.’ ഐശ്വര്യ പറഞ്ഞു.
ആര്‍ടി ടീം വര്‍ക്‌സിന്റെയും വിവി സ്റ്റുഡിയോസിന്റെയും ബാനറില്‍ തെലുങ്ക് താരം രവി തേജയും വിഷ്ണു വിശാലും ചേര്‍ന്നാണ് ചിത്രം നിര്‍മ്മിച്ചിരിക്കുന്നത്. ഡിസംബര്‍ 2 ന് മാജിക് ഫ്രെയിംസ് ചിത്രം കേരളത്തിലെത്തിക്കും. റിച്ചാര്‍ഡ് എം നാഥന്‍ ഛായഗ്രഹണവും ജസ്റ്റിന്‍ പ്രഭാകരന്‍ സംഗീതവും നിര്‍വഹിച്ച ചിത്രത്തിന്റെ ഒരു പുതിയ ഗാനവും കൊച്ചിയിലെ പത്ര സമ്മേളനത്തില്‍ വെച്ച് പുറത്തുവിട്ടു. പി.ആര്.ഒ സി.കെ.അജയ് കുമാര്‍.
Recent Comments