മാത്യു തോമസ്, മാളവികാ മോഹനന്‍ എന്നിവരെ കേന്ദ്രകഥാപാത്രങ്ങളാക്കി നവാഗതനായ ആല്‍വിന്‍ ഹെന്റി സംവിധാനം ചെയ്യുന്ന ചിത്രത്തിന് ടൈറ്റിലായി- ക്രിസ്റ്റി. ചിത്രത്തിന്റെ ഫസ്റ്റ് ലുക്കും ടൈറ്റിലും കുറച്ചു മുമ്പാണ് റിലീസ് ചെയ്തത്. പൃഥ്വിരാജ്, ജയസൂര്യ, ടൊവിനോ തോമസ്, ഉണ്ണി മുകുന്ദന്‍, സണ്ണി വെയ്ന്‍, ആന്റണി പെപ്പെ, ജോയി മാത്യു, മഞ്ജു വാര്യര്‍ എന്നിവരുടെ ഒഫീഷ്യല്‍ പേജിലൂടെയായിരുന്നു റിലീസ്. ചിത്രത്തിലെ നായക കഥാപാത്രത്തിന്റെ പേരാണ് ക്രിസ്റ്റി. യുവനിരയിലെ ശ്രദ്ധേയരായ നടന്‍ മാത്യു തോമസാണ് ക്രിസ്റ്റിയെ അവതരിപ്പിക്കുന്നത്. ബോളിവുഡ് അടക്കം വിവിധ ഭാഷാചിത്രങ്ങളിലൂടെ ശ്രദ്ധേയയായ മാളവികാ മോഹനനാണ് നായിക. ജോയ് മാത്യു, വിനീത് വിശ്വം, രാജേഷ് മാധവന്‍, മുത്തുമണി, ജയ എസ്. കുറുപ്പ്, വീണാ നായര്‍, സ്മിനു സിജോ, മഞ്ജു പത്രോസ് എന്നിവരും പ്രധാന താരങ്ങളാണ്.
സംവിധായകന്‍ കൂടിയായ ആല്‍വിന്‍ ഹെന്റിയുടെ കഥയ്ക്ക് തിരക്കഥ ഒരുക്കിയിരിക്കുന്നത് പ്രശസ്ത സാഹിത്യകാരന്മാരായ ബെന്യാമിനും ജി.ആര്‍. ഇന്ദുഗോപനും ചേര്‍ന്നാണ്. തീരപ്രദേശത്തിന്റെ പശ്ചാത്തലത്തിലൊരുങ്ങുന്ന വ്യത്യസ്തമായ ഒരു പ്രണയകഥയാണ് ക്രിസ്റ്റി.
വിനായക് ശശികുമാര്‍, അന്‍വര്‍ അലി, എന്നിവരുടെ വരികള്‍ക്ക് ഗോവിന്ദ് വസന്ത ഈണം പകര്‍ന്നിരിക്കുന്ന നാല് പാട്ടുകളും ചിത്രത്തിന്റെ ഹൈലൈറ്റ്‌സുകളിലൊന്നാണ്.
ആനന്ദ് സി. ചന്ദ്രനാണ് ഛായാഗ്രാഹകന്‍. റോക്കി മൗണ്ടന്‍ സിനിമാസിന്റെ ബാനറില്‍ സജയ് സെബാസ്റ്റ്യന്‍, കണ്ണന്‍ സതീശന്‍ എന്നിവര്‍ ചേര്‍ന്നാണ് ചിത്രം നിര്‍മ്മിച്ചിരിക്കുന്നത്. പോസ്റ്റ് പ്രൊഡക്ഷന്‍ വര്‍ക്കുകള്‍ പുരോഗമിക്കുന്ന ചിത്രം ഫെബ്രുവരിയില്‍ തീയേറ്ററുകളില്‍ പ്രദര്‍ശനത്തിനെത്തും. പി.ആര്‍.ഒ. വാഴൂര്‍ ജോസ്.
Recent Comments