വിഷ്ണു ഉണ്ണികൃഷ്ണനും ബിബിന്‍ ജോര്‍ജും ആദ്യമായി തിരക്കഥയെഴുതി സംവിധാനം ചെയ്യുന്ന ചിത്രമാണ് വെടിക്കെട്ട്. ചിത്രത്തിന്റെ കാസ്റ്റിംഗ് കാള്‍ അനൗണ്‍സ്‌മെന്റ് മുതലിങ്ങോട്ട് ഏറ്റവും പുതുമയാര്‍ന്ന പ്രൊമോഷന്‍ വീഡിയോകളാണ് വെടിക്കെട്ട് ടീം പുറത്തിറക്കിയത്. എല്ലാം പ്രേക്ഷകശ്രദ്ധ പിടിച്ചുപറ്റിയവയായിരുന്നു. ഇപ്പോഴിതാ ചിത്രത്തിന്റെ റിലീസ് ഡേറ്റും ജോറാക്കിയിരിക്കുകയാണ് വെടിക്കെട്ടിന്റെ അണിയറപ്രവര്‍ത്തകര്‍.
അവര്‍ പുറത്തിറക്കിയിരിക്കുന്ന പ്രൊമോഷന്‍ വീഡിയോയ്ക്ക് നല്‍കിയിരിക്കുന്ന തലക്കെട്ടുതന്നെ ‘വെടിക്കെട്ട് റിലീസ് ഡേറ്റിനെ ചൊല്ലി സംഘര്‍ഷം; നിര്‍മ്മാതാക്കളും സംവിധായകരും തമ്മിലടി’ എന്നാണ്. നിര്‍മ്മാതാക്കളായ എന്‍.എം. ബാദുഷയും ഷിനോയ് മാത്യുവും സംവിധായകരായ വിഷ്ണു ഉണ്ണികൃഷ്ണനും ബിബിന്‍ ജോര്‍ജും ഒരു മേശയ്ക്ക് ചുറ്റുമിരുന്ന് വെടിക്കെട്ടിന്റെ റിലീസ് ഡേറ്റിനെ ചൊല്ലി കലഹിക്കുന്നതാണ് വീഡിയോയുടെ ഉള്ളടക്കം. ഒടുവില്‍ ചിത്രം ഫെബ്രുവരി 3 ന് തീയേറ്ററുകളില്‍ റിലീസ് ചെയ്യും എന്ന് ഒത്തൊരുമിച്ച് അവര്‍ പ്രഖ്യാപിക്കുന്നിടത്താണ് വീഡിയോ അവസാനിക്കുന്നത്. വെടിക്കെട്ടിന്റെ മറ്റു പ്രൊമോഷന്‍ വീഡിയോ പോലെ ഇതും റിലീസ് ചെയ്തതിന് പിന്നാലെ വയറലായിക്കൊണ്ടിരിക്കുകയാണ്.
‘ഈ ചിത്രത്തിന്റെ ഓരോ പ്രൊമോഷന്‍ വീഡിയോയ്ക്ക് പിന്നിലും വിഷ്ണുവിന്റെയും വിപിന്‍ജോര്‍ജിന്റെയും ബുദ്ധി തന്നെയാണ്.’ നിര്‍മ്മാതാവ് ബാദുഷ കാന്‍ ചാനലിനോട് പറഞ്ഞു.
വിഷ്ണു ഉണ്ണികൃഷ്ണനും ബിബിന്‍ ജോര്‍ജും കേന്ദ്രകഥാപാത്രങ്ങളെ അവതരിപ്പിക്കുന്ന ചിത്രത്തിലെ നായിക ഐശ്വര്യ അനില്‍കുമാറാണ്. ഇരുനൂറോളം പുതുമുഖ താരങ്ങളും ചിത്രത്തിന്റെ ഭാഗമാകുന്നു. ശ്രീഗോകുലം മൂവീസാണ് കേരളത്തിലെ 130 ഓളം തീയേറ്ററുകളില്‍ ചിത്രം പ്രദര്‍ശനത്തിനെത്തിക്കുന്നത്. ശ്രീഗോകുലം മൂവീസ് നിര്‍മ്മാണപങ്കാളികൂടിയാണ്.
Recent Comments