സൂപ്പര്‍ ഹിറ്റ് ചിത്രം ‘അജഗജാന്തര’ത്തിനു ശേഷം ടിനു പാപ്പച്ചന്‍ സംവിധാനം ചെയ്യുന്ന ‘ചാവേറി’ന്റെ ടീസര്‍ പുറത്തിറങ്ങി. കത്തിയെരിയുന്ന കാട്, അവിടെ നിന്നും ജീവനും കൊണ്ടോടുന്നൊരാള്‍. അയാള്‍ക്ക് പിന്നാലെ പാഞ്ഞെത്തുന്ന ജീപ്പ്, അതിന് പിന്നിലായി ഓടുന്ന കുഞ്ചാക്കോ ബോബന്‍, അതിന് പിറകിലായി ഒരു തെയ്യക്കോലവും. കരിമ്പാറകളും ഇടതൂര്‍ന്ന മരങ്ങളും പരന്ന കാടിന് നടുവില്‍ നടക്കുന്ന ചോരപൊടിയുന്ന സംഭവ പരമ്പരകള്‍. ഒടുവില്‍ മുമ്പേ ഓടിയയാളുടെ തലയില്‍ ചാക്കോച്ചന്‍ വക വടിവാളിനൊരു വെട്ട്. ചോര ചിന്തുന്ന ചിത്രമായിരിക്കുമെന്നുറപ്പ് നല്‍കുന്നതാണ് ടീസര്‍.
ടിനുവിന്റെ മുന്‍കാല ചിത്രങ്ങളില്‍നിന്ന് വ്യത്യസ്തമായി ത്രില്ലറാണ് ചാവേര്‍. അടുത്തിടെയായി വ്യത്യസ്ത കഥാപാത്രങ്ങളിലൂടെ ഞെട്ടിച്ചിട്ടുള്ള ചാക്കോച്ചന്‍ ചാവേറിലും കട്ട ലോക്കല്‍ ലുക്കിലാണുള്ളത്.
ഏറെ വ്യത്യസ്തവും ആകാംക്ഷയുണര്‍ത്തുന്നതുമായ ‘ചാവേറി’ന്റെ പോസ്റ്ററും ചര്‍ച്ചയായിരുന്നു. ഇപ്പോഴിതാ ടീസറിനും യുട്യൂബില്‍ വലിയ സ്വീകാര്യതയാണ് ലഭിച്ചിരിക്കുന്നത്. നടനും സംവിധായകനുമായ ജോയ് മാത്യുവാണ് തിരക്കഥയെഴുതുന്നത്. അരുണ്‍ നാരായണ്‍, വേണു കുന്നപ്പിള്ളി എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. എക്‌സിക്യൂട്ടീവ് പ്രൊഡ്യൂസര്‍ ജിയോ എബ്രാഹം, ബിനു സെബാസ്റ്റ്യന്‍. പി.ആര്.ഒ: മഞ്ജു ഗോപിനാഥ്.
Recent Comments