സെലിബ്രിറ്റി ക്രിക്കറ്റ് ലീഗിന് ഫെബ്രുവരി 18ന് തുടക്കമാകും. 19ന് നടക്കുന്ന ആദ്യ മത്സരത്തില്‍ കേരള സ്‌ട്രൈക്കേഴ്‌സ് തെലുങ്ക് വാരിയേഴ്‌സിനെ നേരിടും. ലഖ്‌നൗവില്‍ ഉച്ചയ്ക്കാണ് മത്സരം.
മൂന്നു വര്‍ഷത്തെ ഇടവേളക്ക് ശേഷം നടക്കുന്ന സി സി എല്ലില്‍ മലയാളത്തെ പ്രതിനിധീകരിക്കുന്നത് C3 കേരള സ്‌ട്രൈക്കേഴ്‌സ് ആണ്. കുഞ്ചാക്കോ ബോബനാണ് കേരള സ്‌ട്രൈക്കേഴ്‌സിന്റെ ക്യാപ്റ്റനും ബ്രാന്‍ഡ് അംബാസിഡറും. ഇന്ദ്രജിത്ത്, ആസിഫ് അലി, സൈജു കുറുപ്പ്, വിജയ് യേശുദാസ്, ഉണ്ണി മുകുന്ദന്‍, രാജീവ് പിള്ള, അര്‍ജുന്‍ നന്ദകുമാര്‍, വിവേക് ഗോപന്‍, മണിക്കുട്ടന്‍, സിജു വില്‍സണ്‍, ഷഫീഖ് റഹ്‌മാന്‍, വിനു മോഹന്‍, പ്രശാന്ത് അലക്‌സാണ്ടര്‍, നിഖില്‍ മേനോന്‍, സഞ്ജു ശിവറാം, പ്രജോദ് കലാഭവന്‍, ആന്റണി പെപ്പെ, സിദ്ധാര്‍ത്ഥ് മേനോന്‍, ജീന്‍ പോള്‍ ലാല്‍ എന്നിവരാണ് ടീം അംഗങ്ങള്‍. ദീപ്തി സതിയും പ്രയാഗ മാര്‍ട്ടിനുമാണ് വനിത അംബാസിഡര്‍മാര്‍. അഖില്‍ അക്കിനേനിയാണ് തെലുങ്ക് വാരിയേഴ്‌സിന്റെ ക്യാപ്റ്റന്‍.
മോഹന്‍ലാല്‍, രാജ്കുമാര്‍ സേതുപതി, ശ്രീപ്രിയ സേതുപതി, നാഗാര്‍ജുന്‍ സേതുപതി, പിഎം ഷാജി, ജയ്‌സണ്‍, മിബു ജോസ് നെറ്റിക്കാടന്‍ എന്നിവരാണ് കേരള സ്‌ട്രൈക്കേഴ്‌സ് ടീമിന്റെ സഹ ഉടമകള്‍.
മലയാളം, തമിഴ്, തെലുങ്ക്, കന്നഡ, ഹിന്ദി, ബംഗാളി, പഞ്ചാബി, ഭോജ്പുരി തുടങ്ങി വിവിധ ഭാഷകളിലെ ചലച്ചിത്ര പ്രവര്‍ത്തകര്‍ അണിനിരക്കുന്ന ടീമുകളാണ് സി സി എല്ലില്‍ മാറ്റുരയ്ക്കുന്നത്. ആകെ 19 മത്സരങ്ങളാണ് ഇത്തവണ സി സി എല്ലില്‍ ഉണ്ടാവുക. മാര്‍ച്ച് 19ന് ഹൈദരാബാദിലാണ് ഫൈനല്‍ മത്സരം. എല്ലാ മത്സരങ്ങളും വാരാന്ത്യങ്ങളിലായിരിക്കും. പാര്‍ലെ ബിസ്‌ക്കറ്റാണ് സെലിബ്രിറ്റി ക്രിക്കറ്റ് ലീഗിന്റെ ഇപ്രാവശ്യത്തെ ടൈറ്റില്‍ സ്‌പോണ്‍സര്‍.
സെലിബ്രിറ്റി ക്രിക്കറ്റ് ലീഗിന്റെ 2023 എഡിഷന്‍ ഒരു പുതിയ മത്സരഘടനയുമായാണ് എത്തുന്നത്. ടെസ്റ്റ് മത്സരങ്ങളുടെയും ട്വന്റി-20 മത്സരങ്ങളുടെയും ഒരു സംയോജിത രൂപമാണ് പുതിയ ഘടനയില്‍ ഉള്ളത്. ഇതനുസരിച്ച് ആദ്യം ഇരു ടീമുകളും 10 ഓവര്‍ വീതം ബാറ്റ് ചെയ്യും. തുടര്‍ന്ന് ആദ്യം ബാറ്റ് ചെയ്ത ടീം വീണ്ടും 10 ഓവര്‍ ബാറ്റ് ചെയ്യും. പിന്നീട് റണ്‍റേറ്റിന്റെ അടിസ്ഥാനത്തില്‍ അടുത്ത ടീമിന് വീണ്ടും ബാറ്റിംഗ് അനുവദിക്കുകയും ചെയ്യുന്ന തരത്തിലാണ് മത്സരങ്ങള്‍ ക്രമീകരിച്ചിരിക്കുന്നത്.
Recent Comments