കഥാപാത്ര വൈവിദ്ധ്യം കൊണ്ട് തമിഴ് സിനിമയിലെ താരനിരയില്‍ ഏറെ ശ്രദ്ധ നേടിയ നടനാണ് ധനുഷ്. ഏറെ വ്യത്യസ്തമായ കഥാപാത്രങ്ങളാണ് അദ്ദേഹത്തെ ഓരോ വര്‍ഷവും തേടിയെത്താറുള്ളത്. ധനുഷ് അധ്യാപക വേഷത്തിലെത്തുന്ന ‘വാത്തി’ ഈ വര്‍ഷം അദ്ദേഹത്തിന്റെ ആദ്യ റിലീസാണ്. സിനിമയുടേതായി പുറത്തിറങ്ങിയ ട്രെയിലറും ഗാനങ്ങളുമൊക്കെ ഇതിനകം വലിയ പ്രതീക്ഷയാണ് നല്‍കിയിരിക്കുന്നത്. ഈ മാസം 17നാണ് തമിഴിലും തെലുങ്കിലുമായി ചിത്രം വേള്‍ഡ് വൈഡ് റിലീസിനെത്തുന്നത്.
കഴിഞ്ഞ വര്‍ഷം വന്‍ വിജയം നേടിയ ‘തിരുച്ചിറ്റമ്പലം’ എന്ന ചിത്രത്തിനു ശേഷം ധനുഷ് നായകനായെത്തിയ ‘നാനേ വരുവേന്‍’ പ്രതീക്ഷിച്ച വിജയം നേടിയിരുന്നില്ല. നൂറ് കോടിക്ക് മുകളിലായിരുന്നു തിരുച്ചിറ്റമ്പലത്തിന്റെ ബോക്‌സോഫീസ് കളക്ഷന്‍. ഈ വര്‍ഷം ‘വാത്തി’യുമായി ധനുഷ് എത്തുമ്പോള്‍ തിരുച്ചിറ്റമ്പലത്തിന്റെ കളക്ഷന്‍ മറികടക്കുമെന്നാണ് ആരാധകരുടെ കണക്കുകൂട്ടല്‍.
സിനിമയുടെ പ്രീമിയര്‍ ഷോ കണ്ടവരുടെ പ്രതികരണങ്ങള്‍ അത് ശരി വയ്ക്കുന്നതുമാണ്. ‘ഏറെ വൈകാരികമായ കഥാസന്ദര്‍ഭങ്ങളിലൂടെ ഏവര്‍ക്കും കണക്ടാകുന്ന രീതിയില്‍ അവതരിപ്പിച്ച മനോഹരമായ സിനിമ, ജി.വി.യുടെ പശ്ചാത്തല സംഗീതം അതിഗംഭീരം, ഇത് ധനുഷിന്റെ തിരിച്ചുവരവാകും, തിരുച്ചിറ്റമ്പലത്തിന് ശേഷം മറ്റൊരു സര്‍പ്രൈസ് ഹിറ്റാകാന്‍ പോകുന്ന സിനിമ, പ്രേക്ഷകരെ പിടിച്ചിരുത്തുന്ന മേക്കിംഗ്’ തുടങ്ങി നിരവധി പ്രതികരണങ്ങളാണ് കഴിഞ്ഞ ദിവസം സിനിമയുടെ പ്രീമിയര്‍ കഴിഞ്ഞതോടെ ചിത്രത്തിനെ കുറിച്ച് സോഷ്യല്‍മീഡിയയില്‍ വന്നുകൊണ്ടിരിക്കുന്നത്.
തമിഴില്‍ ‘വാത്തി’ എന്ന പേരിലും തെലുങ്കില്‍ ‘സര്‍’ എന്ന പേരിലുമാണ് ചിത്രമെത്തുന്നത്. ബാലമുരുകന്‍ എന്നാണ് വാത്തിയില്‍ ധനുഷ് അവതരിപ്പിക്കുന്ന കഥാപാത്രത്തിന് പേര്. വെങ്കി അറ്റ്‌ലൂരിയൊരുക്കിയ ചിത്രം വിദ്യാഭ്യാസ കച്ചവടം പ്രമേയമാക്കി ശക്തമായൊരു കഥയുടെ പിന്‍ബലവുമായാണ് എത്തുന്നത്. സ്‌കന്ദ സിനിമാസാണ് ഐന്‍സ്റ്റീന്‍ മീഡിയയുമായി ചേര്‍ന്ന് ‘വാത്തി’ കേരളത്തില്‍ പ്രദര്‍ശനത്തിന് എത്തിക്കുന്നത്. കേരളത്തിലെ 100 ഓളം തീയേറ്ററുകളില്‍ ‘വാത്തി’ പ്രദര്‍ശനത്തിനെത്തുന്നുണ്ട്.
സിനിമയുടെ തമിഴ്നാട്ടിലെ തിയറ്റര്‍ അവകാശം സെവന്‍ സ്‌ക്രീന്‍ സ്റ്റുഡിയോയാണ് സ്വന്തമാക്കിയിരിക്കുന്നത്. മലയാളി താരം സംയുക്തയാണ് നായിക. തമിഴില്‍ സംയുക്തയുടെ ഏറെ ശ്രദ്ധേയമായ വേഷമായിരിക്കും വാത്തിയിലേതെന്നാണ് സൂചന. സായ് കുമാര്‍, തനിക്കെല്ല ഭരണി, സമുദ്രക്കനി, തോട്ടപ്പള്ളി മധു, ആടുകളം നരേന്‍, ഇളവരശു എന്നിവരും വാത്തിയില്‍ അഭിനയിക്കുന്നു.
ധനുഷ് എഴുതിയ ഒരു ഗാനം വന്‍ ഹിറ്റായി മാറിയിരുന്നതാണ്. ജി വി പ്രകാശ് കുമാറാണ് സംഗീത സംവിധാനം നിര്‍വഹിച്ചിരിക്കുന്നത്. ഓഡിയോ റൈറ്റ്‌സ് സ്വന്തമാക്കിയിരിക്കുന്നത് ആദിത്യ മ്യൂസിക്കാണ്. വംശി എസും സായ് സൗജന്യയും ചേര്‍ന്നാണ് ‘വാത്തി’ നിര്‍മിക്കുന്നത്. നവീന്‍ നൂളിയാണ് എഡിറ്റര്‍.
Recent Comments