അമിതാഭ് ബച്ചന്‍, പ്രഭാസ്, ദീപിക പദുക്കോണ്‍ എന്നിവര്‍ പ്രധാനവേഷങ്ങളില്‍ അഭിനയിച്ച പ്രൊജക്ട് ‘കെ’യുടെ റിലീസ് തീയ്യതി പ്രഖ്യാപിച്ചു. 2024 ജനുവരി 24ന് ചിത്രം തീയേറ്ററുകളിലെത്തും. ഇത് സംബന്ധിച്ച സ്ഥിരീകരണം നിര്‍മ്മാതക്കള്‍തന്നെയാണ് സാമൂഹ്യ മാധ്യമങ്ങളിലൂടെ അറിയിച്ചത്.
മരുഭൂമിയുടെ നടുവിലെ ഒരു വലിയ കൈ ലക്ഷ്യമാക്കി സ്‌നൈപ്പര്‍മാര്‍ ജാഗ്രതയോടെ നടക്കുന്ന പോസ്റ്ററോട് കൂടിയാണ് റിലീസിംഗ് തീയ്യതി പ്രഖ്യാപിച്ചിട്ടുള്ളത്.
ചിത്രത്തിലെ അഭിനേതാക്കളുടെ ലുക്ക് ഇതുവരെ പുറത്ത് വിട്ടിട്ടില്ല. ആകെ പുറത്തിറക്കിയത് പ്രഭാസിന്റെ കൈയുടെ പോസ്റ്ററും ദീപികയുടെ സ്റ്റില്‍ ഔട്ടും മാത്രമാണ്.
നാഗ് അശ്വിനാണ് പ്രൊജക്ട് കെ എന്ന് താല്‍ക്കാലികമായി നാമകരണം ചെയ്തിരിക്കുന്ന ചിത്രത്തിന്റെ സംവിധായകന്‍. സാവിത്രിയുടെ ജീവിതകഥ പറഞ്ഞ മഹാനടിക്ക് ശേഷം അദ്ദേഹം സംവിധാനം ചെയ്യുന്ന ചിത്രംകൂടിയാണിത്. ചിത്രത്തില്‍ ക്രിയേറ്റീവ് മെന്ററായി പ്രശസ്ത സംവിധായകനും നടനുമായ സിങ്കീതം ശ്രീനിവാസ റാവു എത്തുന്നുണ്ട്. വൈജയന്തി മൂവീസിന്റെ ബാനറിൽ അശ്വനി ദത്താണ്‌ ചിത്രം നിർമ്മിക്കുന്നത്. നിരവധി ബോളിവുഡ് താരങ്ങളും ചിത്രത്തിന്റെ ഭാഗമാകുന്നുണ്ട്. തെലുങ്കിലും ഹിന്ദിയിലുമായി ഒരേ സമയമാണ് ചിത്രീകരിക്കുന്നത്. ഇന്ത്യയിലെ മറ്റു ഭാഷകളിലേയ്ക്കും മൊഴിമാറ്റം ചെയ്യും.
Recent Comments