ടൊവിനോ തോമസ് നായകനാകുന്ന പുതിയ ചിത്രമാണ് അന്വേഷിപ്പിന്‍ കണ്ടെത്തും. നവാഗതനായ ഡാര്‍വിന്‍ കുര്യാക്കോസാണ് സംവിധായകന്‍. ജോണി ആന്റണി, ജിനു.വി. ഏബ്രഹാം എന്നിവരുടെ കീഴില്‍ സംവിധാന സഹായിയായിരുന്നു ഡാര്‍വിന്‍ കുര്യാക്കോസ്.
തീയേറ്റര്‍ ഓഫ് ഡ്രീംസിന്റെ ബാനറില്‍ ഡോള്‍വിന്‍ കുര്യാക്കോസും ജിനു വി. എബ്രഹാമും ചേര്‍ന്നാണ് ചിത്രം നിര്‍മ്മിക്കുന്നത്. കാപ്പയുടെ മികച്ച വിജയത്തിനു ശേഷം തീയേറ്റര്‍ ഓഫ് ഡ്രീംസ് നിര്‍മ്മിക്കുന്ന ചിത്രം കൂടിയാണിത്. സംവിധായകന്‍ ഡാര്‍വിന്‍ കുര്യാക്കോസും നിര്‍മ്മാതാവ് ഡോള്‍വിന്‍ കുര്യാക്കോസും ഇരട്ട സഹോദരങ്ങളാണ്.
ചിത്രത്തിന്റെ ഷൂട്ടിംഗ് മാര്‍ച്ച് 6 ന് കോട്ടയത്ത് തുടങ്ങും. അജയന്റെ രണ്ടാംമോഷണം എന്ന ചലച്ചിത്രത്തിന്റെ ഷൂട്ടിംഗ് പൂര്‍ത്തിയാക്കി മാര്‍ച്ച് 8-ാം തീയതിയോടുകൂടി ടൊവിനോ സെറ്റില്‍ ജോയിന്‍ ചെയ്യും.
വന്‍ ബജറ്റില്‍ ഒരുങ്ങുന്ന ഇന്‍വസ്റ്റിഗേറ്റീവ് ത്രില്ലറാണ് ചിത്രം. എന്നാല്‍ പതിവു രീതിയിലുള്ള അന്വേഷണങ്ങളുടെ കഥയല്ല, മറിച്ച് അന്വേഷകരുടെ കഥയാണ് ചിത്രം പറയുന്നത്.
എഴുപതോളം അഭിനേതാക്കള്‍ ചിത്രത്തിന്റെ ഭാഗമാകും. സിദ്ദിഖ്, ഇന്ദ്രന്‍സ്, ഷമ്മി തിലകന്‍ ബാബുരാജ്, പ്രമോദ് വെളിയനാട്, വിനീത് തട്ടില്‍, രമ്യാ സുവി എന്നിവരാണ് ഇതിനോടകം കാസ്റ്റ് ചെയ്യപ്പെട്ട താരങ്ങള്‍. രണ്ട് പുതുമുഖ നായികമാരാണ് ചിത്രത്തിലുള്ളത്. ഇവരുടേതടക്കം കാസ്റ്റിംഗ് നടന്നുവരികയാണ്.
സന്തോഷ് നാരായണനാണ് ചിത്രത്തിന് സംഗീതം ഒരുക്കുന്നത്. തമിഴ്, തെലുങ്ക് സിനിമകള്‍ക്കുവേണ്ടി നിരവധി ഹിറ്റുഗാനങ്ങള്‍ ഒരുക്കിയ സംഗീതസംവിധായകനാണ് സന്തോഷ് നാരായണന്‍. വിനയന്‍ സംവിധാനം ചെയ്ത പത്തൊമ്പതാം നൂറ്റാണ്ട് എന്ന ചിത്രത്തിന് പഞ്ചാത്തല സംഗീതം നിര്‍വ്വഹിച്ചതും സന്തോഷ് നാരായണനായിരുന്നു. എന്നാല്‍ ഇത് ആദ്യമായിട്ടാണ് ഒരു മലയാള സിനിമയുടെ സംഗീതവിഭാഗത്തിന്റെ പൂര്‍ണ്ണ ചുമതല സന്തോഷ് ഏറ്റെടുക്കുന്നത്.
രണ്ട് ഷെഡ്യൂളുകളിലായിട്ടാണ് ചിത്രീകരണം. കോട്ടയവും തൊട്ടുപുഴയും കട്ടപ്പനയുമാണ് പ്രധാന ലൊക്കേഷനുകള്‍. ചിത്രത്തിന് വേണ്ടി നാലുകോടി രൂപയോളം ചെലവിട്ട് ഒരു ടൗണ്‍ഷിപ്പിന്റെ സെറ്റ് പൂര്‍ത്തിയാക്കിയിരിക്കുകയാണ് കലാസംവിധായകന്‍ ദിലീപ് നാഥ്.
ചായാഗ്രഹണം ഗൗതം ശങ്കര്‍, എഡിറ്റര്‍ സൈജു ശ്രീധര്‍, മേക്കപ്പ് സജി കാട്ടാക്കട, കോസ്റ്റ്യൂം ഡിസൈനര്‍ സമീരാ സനീഷ്, പ്രൊഡക്ഷന്‍ കണ്‍ട്രോളര്‍ ബെന്നി കട്ടപ്പന, പിആര്‍ഒ വാഴൂര്‍ ജോസ്.
Recent Comments