മമ്മൂട്ടിയെ നായകനാക്കി റോബി വര്‍ഗ്ഗീസ് രാജ് സംവിധാനം ചെയ്യുന്ന കണ്ണൂര്‍ സ്‌ക്വാഡിന്റെ ഷൂട്ടിംഗ് ഇപ്പോള്‍ വയനാട്ടില്‍ പുരോഗമിക്കുകയാണ്. ചിത്രത്തില്‍ മമ്മൂട്ടിയോടൊപ്പം വിജയ് സേതുപതിയും അഭിനയിക്കുന്നുണ്ട് എന്ന തരത്തില്‍ സോഷ്യല്‍ മീഡിയയില്‍ വാര്‍ത്തകള്‍ പ്രചരിക്കുന്നുണ്ട്. അതിന്റെ സത്യാവസ്ഥ ഞങ്ങളും അന്വേഷിച്ചിരുന്നു. വാസ്തവത്തില്‍ വിജയ് സേതുപതി കണ്ണൂര്‍ സ്‌ക്വാഡില്‍ അഭിനയിക്കുന്നില്ല. പക്ഷേ അദ്ദേഹം വയനാട്ടില്‍ എത്തുന്നുണ്ട്. അവിടുത്തെ ഒരു ടെക്‌സ്‌റ്റൈല്‍ ഷോപ്പിന്റെ ഉദ്ഘാടനം നിര്‍വ്വഹിക്കുന്നത് വിജയ് സേതുപതിയാണ്. ഇതിനായി അദ്ദേഹം മാര്‍ച്ച് 18 ന് വയനാട്ടിലെത്തും. 19 നാണ് ഉദ്ഘാടനം. വിജയ് സേതുപതിക്കുള്ള താമസസൗകര്യം ഒരുക്കിയിരിക്കുന്നത് മമ്മൂട്ടി താമസിക്കുന്ന സപ്ത റിസോര്‍ട്ടിലാണ്. അവിടെവച്ച് ചിലപ്പോള്‍ ഇരുവരുടെയും കൂടിക്കാഴ്ച നടന്നേക്കാം. അതിനപ്പുറത്തേയ്ക്ക് ഇപ്പോള്‍ പ്രചരിക്കുന്ന വാര്‍ത്തകളെല്ലം അസത്യമാണ്.
കൊല്ലത്ത് കരുനാഗപ്പള്ളിയില്‍ പ്രവര്‍ത്തിക്കുന്ന യെസ് ഭാരത് എന്ന ടെക്‌സ്‌റ്റൈല്‍ ഷോറൂമിന്റെ ഉദ്ഘാടനം നിര്‍വ്വഹിച്ചത് മോഹന്‍ലാലായിരുന്നു. വയനാട്ടില്‍ അവര്‍ ആരംഭിക്കുന്ന പുതിയ ഷോറൂമിന്റെ ഉദ്ഘാടനത്തിന് ക്ഷണിച്ചതും ലാലിനെയായിരുന്നു. പക്ഷേ അദ്ദേഹം രാജസ്ഥാനിലാണുള്ളത്. അതുകൊണ്ടുതന്നെ അസൗകര്യം അറിയിച്ചിരുന്നു. ലാലിന് പകരക്കാരനായിട്ടാണ് വിജയ് സേതുപതി വയനാട്ടില്‍ എത്തുന്നത്.
Recent Comments