വെള്ളിമൂങ്ങ, ജോണി ജോണി യെസ് അപ്പാ എന്നീ ചിത്രങ്ങള്‍ക്ക് തിരക്കഥ എഴുതി ജോജി തോമസും, വെളളി മൂങ്ങയുടെ സഹ സംവിധായകന്‍ രാജേഷ് മോഹനും ചേര്‍ന്ന് സംവിധാനം ചെയ്യുന്ന ചിത്രമാണ് തീപ്പൊരി ബെന്നി. ചിത്രത്തിന്റെ ഷൂട്ടിംഗ് തൊടുപുഴയില്‍ ആരംഭിച്ചു.
തീവ്രമായ ഇടതുപക്ഷ ചിന്താഗതിയുള്ള വട്ടക്കുട്ടയില്‍ ചേട്ടായിയുടേയും രാഷ്ട്രീയത്തെ വെറുക്കുന്ന മകന്‍ ബെന്നിയുടേയും ജീവിത സന്ദര്‍ഭങ്ങളെ കോര്‍ത്തിണക്കി ഒരുക്കുന്ന തികഞ്ഞ കുടുംബചിത്രമാണ് തീപ്പൊരി ബെന്നി. യുവ നിരയിലെ ശ്രദ്ധേയനായ നടന്‍ അര്‍ജുന്‍ അശോകനാണ് തീപ്പൊരി ബെന്നിയെ അവതരിപ്പിക്കുന്നത്. വട്ടക്കുട്ടയില്‍ ചേട്ടായിയെ ജഗദീഷും അവതരിപ്പിക്കുന്നു. ഫെമിനാ ജോര്‍ജാണ് നായിക. മിന്നല്‍ മുരളിയിലെ നായികയായിരുന്നു ഫെമിന.
ഷെബിന്‍ ബക്കര്‍ പ്രൊഡക്ഷന്‍സിന്റെ ബാനറില്‍ ഷെബിന്‍ ബക്കറാണ് ഈ ചിത്രം നിര്‍മ്മിക്കുന്നത്. ഷെബിന്‍ ബെക്കര്‍ പ്രൊഡക്ഷന്‍സിന്റെ പത്താമത്തെ ചിത്രമാണിത്. മുല്ല, പുള്ളിപ്പുലിയും ആട്ടിന്‍കുട്ടിയും, ചാര്‍ലി, ടേക്ക് ഓഫ്, തട്ടുമ്പറത്ത് അച്ചുതന്‍, തണ്ണീര്‍മത്തന്‍ ദിനങ്ങള്‍, സൂപ്പര്‍ ശരണ്യ, പൂവന്‍ എന്നിവ ഈ ബാനറില്‍ നിര്‍മ്മിച്ച ചിത്രങ്ങളാണ്.
ടി.ജി. രവി, പ്രേംപ്രകാശ്, സന്തോഷ് കീഴാറ്റൂര്‍, ഷാജു ശീധര്‍, ശ്രീകാന്ത് മുരളി, റാഫി, നിഷാ സാരംഗ് എന്നിവരും ചിത്രത്തില്‍ അഭിനയിക്കുന്നു. സംഗീതം ശ്രീരാഗ് സജി, ഛായാഗ്രഹണം അജയ് ഫ്രാന്‍സിസ് ജോര്‍ജ്, എഡിറ്റിംഗ് സൂരജ് ഈ.എസ്., പ്രൊഡക്ഷന്‍ കണ്‍ട്രോളര്‍ അലക്‌സ് ഇ. കുര്യന്‍, പി.ആര്.ഒ. വാഴൂര്‍ ജോസ്.
Recent Comments