ആടുജീവിതത്തിന്റെ വിശേഷങ്ങള്‍ തിരക്കി വിളിക്കുമ്പോഴെല്ലാം സംവിധായകന്‍ ബ്ലെസി ഞങ്ങളെ സ്‌നേഹപൂര്‍വ്വം വിലക്കിയിട്ടുണ്ട്. ‘സിനിമയുടെ റിലീസിന് മുന്നോടിയായി ഒരു വലിയ ലോഞ്ചിംഗ് ഫംഗ്ഷന്‍ വയ്ക്കുന്നുണ്ടെന്നും അതിനുശേഷം ആടുജീവിതവുമായി ബന്ധപ്പെട്ട വാര്‍ത്തകള്‍ വരുന്നതായിരിക്കും നല്ലതെന്നും’ അദ്ദേഹം ഓര്‍മ്മിപ്പിച്ചുകൊണ്ടേയിരുന്നു.
എന്നിട്ടും കഴിഞ്ഞ ദിവസം ഡെഡ് ലൈന്‍ എന്ന പേരിലുള്ള ഒരു വെബ്‌സൈറ്റില്‍ ചിത്രത്തിന്റെ ട്രെയിലര്‍ പ്രത്യക്ഷപ്പെട്ടു. എംബെഡ് ചെയ്താണ് ആ വീഡിയോ നല്‍കിയിരുന്നതെങ്കിലും പെട്ടെന്നുതന്നെ ആ വീഡിയോയും വാര്‍ത്തയും വൈറലായി. ജിമ്മി ജീന്‍ ലൂയിസ് എന്ന ഹോളിവുഡ് താരവും ചിത്രത്തില്‍ ഒരു പ്രധാന വേഷം ചെയ്യുന്നുണ്ട്. അദ്ദേഹത്തിന്റെ ഭാഗത്തുനിന്നാണ് ആടുജീവിതത്തെ സംബന്ധിച്ചുള്ള വീഡിയോയും വാര്‍ത്തയും പുറത്തുവന്നിരിക്കുന്നത്. അതിന് തൊട്ടുപിന്നാലെ പൃഥ്വിരാജ് പ്രൊഡക്ഷന്‍സ് ഔദ്യോഗികമായിത്തന്നെ ആ ട്രെയിലര്‍ പുറത്തുവിട്ടു.
വാസ്തവത്തില്‍ ആടുജീവിതത്തിന്റെ യഥാര്‍ത്ഥ ട്രെയിലറല്ല, ഡെഡ് ലൈന്‍ എന്ന വിദേശ വെബ്‌സൈറ്റ് വഴി പുറത്ത് വന്നത്. ഇക്കാര്യം പൃഥ്വിരാജ് തന്നെ തന്റെ സോഷ്യല്‍മീഡിയ പേജില്‍ വ്യക്തമാക്കിയിട്ടുണ്ട്. കാന്‍ അടക്കം വിവിധ അന്തര്‍ദ്ദേശീയ ചലച്ചിത്രമേളകളില്‍ പങ്കെടുക്കുന്നതിന്റെ ഭാഗമായി അവര്‍ക്ക് നല്‍കിയ ആടുജീവിതത്തിന്റെ ട്രെയിലര്‍ കട്ടായിരുന്നു അത്. കളര്‍ ഗ്രേഡിംഗ് പോലും പൂര്‍ത്തിയാക്കാത്ത ആ ട്രെയിലര്‍ പുറത്ത് വന്നതോടുകൂടി അത് ഔദ്യോഗികമായി റിലീസ് ചെയ്യാന്‍ ആടുജീവിതത്തിന്റെ അണിയറ പ്രവര്‍ത്തകരെ പ്രേരിപ്പിക്കുകയായിരുന്നു.
2023 ഒക്ടോബര്‍ 20 നാണ് ആടുജീവിതത്തിന്റെ റിലീസ് തീയതി പ്രഖ്യാപിച്ചിരിക്കുന്നത്. അതിന് മുന്നോടിയായി എഡിറ്റര്‍ ശ്രീകര്‍ പ്രസാദ് തയ്യാറാക്കുന്ന ചിത്രത്തിന്റെ യഥാര്‍ത്ഥ ട്രെയിലറിന്റെ പണികള്‍ പൂര്‍ത്തിയായി വരുന്നതേയുള്ളൂ.
അപൂര്‍ണ്ണമാണെങ്കിലും പുറത്തിറങ്ങിയ ആടുജീവിതത്തിന്റെ ട്രെയിലര്‍ കട്ട് അത്ഭുതപ്പെടുത്തുന്നതാണ്. പൃഥ്വിരാജിന്റെ മേക്ക് ഓവറും പ്രകടനവും അതിശയകരമാണ്. ബ്ലെസിയുടെ മേക്കിംഗ് അന്തര്‍ദ്ദേശീയ നിലവാരം പുലര്‍ത്തുന്നു. എ.ആര്‍. റഹ്‌മാന്റെ സംഗീതവും വശ്യമനോഹരമാണ്.
മലയാളത്തില്‍ ഏറ്റവും കൂടുതല്‍ വായിക്കപ്പെട്ടിട്ടുള്ള നോവലുകളിലൊന്നാണ് ബെന്യാമിന്റെ ആടുജീവിതം. അതിന്റെ ദൃശ്യാവിഷ്‌ക്കാരമാണ് ബ്ലെസിയുടെ ചിത്രം. നാല് വര്‍ഷത്തെ ത്യാഗപൂര്‍ണ്ണമായ സമര്‍പ്പണമുണ്ട് ആടുജീവിതത്തിന്റെ ചിത്രീകരണത്തിന് പിന്നില്‍. താരങ്ങളും സാങ്കേതിക പ്രവര്‍ത്തകരുമടക്കം ഓരോ ഡിപ്പാര്‍ട്ട്‌മെന്റുകളും അത്യദ്ധ്വാനം നടത്തിയതിന്റെ ഫലംകൂടിയാണ് ആടുജീവിതം. ഇത് ഒരുപക്ഷേ മലയാളസിനിമ ഇന്നോളം കണ്ടിട്ടില്ലാത്ത ദൃശ്യവിസ്മയമാവാം ആടുജീവിതം.
Recent Comments