കളിയാട്ടവും ഹൈവേയും പത്രവും പ്രണയവര്‍ണ്ണങ്ങളും ചിന്താമണി കൊലക്കേസും ക്രിസ്റ്റ്യന്‍ ബ്രദേഴ്‌സുമടക്കം നിരവധി ഹിറ്റ് സിനിമകള്‍ മലയാളത്തിന് സമ്മാനിച്ച സുരേഷ്‌ഗോപിയും ബിജുമേനോനും ഒരിടവേളയ്ക്കുശേഷം കേന്ദ്രകഥാപാത്രങ്ങളെ അവതരിപ്പിക്കുന്ന ചിത്രമാണ് ഗരുഡന്‍. നവാഗതനായ അരുണ്‍വര്‍മ്മയാണ് ചിത്രം സംവിധാനം ചെയ്യുന്നത്. ചിത്രത്തിന്റെ ഷൂട്ടിംഗ് മെയ് 10 ന് എറണാകുളത്ത് ആരംഭിക്കും. സിദ്ധിക്ക്, ദിലീഷ് പോത്തന്‍, തലൈവാസല്‍ വിജയ് തുടങ്ങി വന്‍ താരനിര ചിത്രത്തിന്റെ ഭാഗമാകുന്നു.
മേജര്‍ രവിയുടെ ആദ്യചിത്രം മുതല്‍ അദ്ദേഹത്തിന്റെ സംവിധാന സഹായിയായി പ്രവര്‍ത്തിച്ചിട്ടുള്ള ചെറുപ്പക്കാരനാണ് അരുണ്‍ വര്‍മ്മ. നിരവധി പരസ്യചിത്രങ്ങളുടെയും സംവിധായകനാണ്. അരുണ്‍ വര്‍മ്മയ്ക്കുവേണ്ടി തിരക്കഥ ഒരുക്കുന്നത് പ്രശസ്ത സംവിധായകന്‍ മിഥുന്‍ മാനുവല്‍ തോമസാണ്. ഓംശാന്തി ഓശാനയ്ക്കുശേഷം മിഥുന്‍ മാനുവല്‍ തിരക്കഥ എഴുതുന്ന രണ്ടാമത്തെ ചിത്രവുമാണ് ഗരുഡന്‍. ജിനേഷിന്റേതാണ് കഥ. ഒരു ക്രൈംത്രില്ലര്‍ ചിത്രമാണ് ഗരുഡന്‍.
മാജിക് ഫ്രെയിംസിന്റെ ബാനറില്‍ ലിസ്റ്റിന്‍ സ്റ്റീഫനാണ് ചിത്രം നിര്‍മ്മിക്കുന്നത്. സുരേഷ് ഗോപിയെ നായകനാക്കി ലിസ്റ്റിന്‍ സ്റ്റീഫന്‍ നിര്‍മ്മിക്കുന്ന ആദ്യ ചിത്രമെന്ന പ്രത്യേകതയും ഗരുഡനുണ്ട്. ജസ്റ്റിന്‍ സ്റ്റീഫന്‍ കോപ്രൊഡ്യൂസറും സന്തോഷ് കൃഷ്ണന്‍ ലൈന്‍ പ്രൊഡ്യൂസറുമാണ്. അജയ് ഡേവിഡ് കാച്ചാപ്പിള്ളിയാണ് ഛായാഗ്രാഹകന്‍. ജേക്‌സ് ബിജോയ് സംഗീതം ഒരുക്കുന്നു. കലാസംവിധാനം അനീഷ് നാടോടി. എഡിറ്റിംഗ് ശ്രീജിത്ത് സാരംഗ്. പ്രൊഡക്ഷന്‍ കണ്‍ട്രോളര്‍ ഡിക്‌സണ്‍ പൊഡുത്താസ്. മേക്കപ്പ് റോണക്‌സ് സേവ്യര്‍. കോസ്റ്റ്യൂം ഡിസൈന്‍ സ്‌റ്റെഫി സേവ്യര്‍. പി.ആര്‍.ഒ. മഞ്ജു ഗോപിനാഥ്. ഡിസൈന്‍ ആന്റണി സ്റ്റീഫന്‍.
Recent Comments