പ്രദര്‍ശനത്തിനെത്തി അഞ്ചാം ദിവസം പിന്നിടുമ്പോള്‍ കളക്ഷന്‍ റെക്കാര്‍ഡുകള്‍ ഭേദിച്ച് മുന്നേറുകയാണ് ജൂഡ് ആന്തണി ജോസഫ് സംവിധാനം ചെയ്ത 2018. ടോവിനോ തോമസ്, കുഞ്ചാക്കോ ബോബന്‍, ആസിഫ് അലി, വിനീത് ശ്രീനിവാസന്‍, അപര്‍ണ ബാലമുരളി, നരേന്‍, ലാല്‍, സിദ്ദിഖ് എന്നിവരാണ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.
ചിത്രത്തിന്റെ വിജയം ആസിഫ് അലിയുടെ പുതിയ സിനിമാ ലൊക്കേഷനില്‍ ആഘോഷിച്ചു. ജിസ് ജോയി സംവിധാനം ചെയ്യുന്ന ചിത്രത്തിന്റെ ലൊക്കേഷനിലായിരുന്നു വിജയാഘോഷം. ഈ ചിത്രത്തില്‍ ആസിഫിനൊപ്പം പ്രധാന വേഷം ചെയ്യുന്ന ബിജുമേനോനും ദിലീഷ് പോത്തനും ആഘോഷത്തില്‍ പങ്കുകൊണ്ടു. കേക്ക് മുറിച്ചാണ് 2018 ന്റെ വിജയത്തില്‍ അവര്‍ പങ്കുചേര്‍ന്നത്.
ഈശോ, ചാവേര്‍ എന്നീ ചിത്രങ്ങള്‍ക്ക് ശേഷം അരുണ്‍ നാരായണ്‍ പ്രൊഡക്ഷന്‍സ് നിര്‍മ്മിക്കുന്ന മൂന്നാമത്തെ ചിത്രം കൂടിയാണിത്. ലണ്ടന്‍ സ്റ്റുഡിയോസും നിര്‍മ്മാണ പങ്കാളിയാണ്.
ജിസ് ജോയിയുടെ കരിയറിലെ ആദ്യ മാസ് ചിത്രംകൂടിയാണിത്. മലബാറിലെ നാട്ടിന്‍പുറത്തെ പശ്ചാത്തലമാക്കി ഒരുങ്ങുന്ന ഇന്‍വെസ്റ്റിഗേറ്റീവ് ത്രില്ലറാണ് ചിത്രം. അനുശ്രീ, മിയ, കോട്ടയം നസീര്‍, ശങ്കര്‍ രാമകൃഷ്ണന്‍, ജോജി കെ. ജോര്‍ജ്, ദിനേഷ്, അനുരൂപ്, നന്ദന്‍ ഉണ്ണി, ബിലാസ് എന്നിവരും താരനിരയിലുണ്ട്.
Recent Comments