വിഷ്ണു ഉണ്ണികൃഷ്ണന്‍, ഷൈന്‍ ടോം ചാക്കോ, അജുവര്‍ഗ്ഗീസ് എന്നിവരെ കേന്ദ്രകഥാപാത്രങ്ങളാക്കി ഹരിദാസ് സംവിധാനം ചെയ്യുന്ന ചിത്രമാണ് താനാരാ. ചിത്രത്തിന്റെ ആദ്യഷെഡ്യൂള്‍ കോട്ടയത്ത് പൂര്‍ത്തിയായി. സെക്കന്റ് ഷെഡ്യൂളില്‍ ഒരു ഗാനരംഗം മാത്രമാണ് അവശേഷിക്കുന്നത്. അതിന്റെ ചിത്രീകരണം ഈ മാസം അവസാനത്തോടെ എറണാകുളത്ത് നടക്കും.
താനാരാ എന്ന ചിത്രത്തിന്റെ ആദ്യ സ്റ്റില്‍സുകളും കാന്‍ ചാനലിന് ലഭിച്ചു. വിഷ്ണു ഉണ്ണികൃഷ്ണന്റെയും ഷൈന്‍ ടോം ചാക്കോയുടെയും ദീപ്തി സതിയുടെയും ക്യാരക്ടര്‍ സ്റ്റില്‍സും അതില്‍ ഉള്‍പ്പെടും.
തൊഴില്‍രംഗത്ത് കൃത്യമായ അജണ്ടകളുള്ള ഒരു മോഷ്ടാവ് ഒരു യുവ രാഷ്ട്രീയക്കാരന്റെ ജീവിതത്തില്‍ എത്തപ്പെടുന്നതോടെ ഉണ്ടാകുന്ന സംഭവങ്ങളുടെ അത്യന്തം രസകരമായ ചലച്ചിത്രാവിഷ്‌ക്കാരമാണ് താനാരാ. മോഷ്ടാവിനെ വിഷ്ണു ഉണ്ണികൃഷ്ണനും രാഷ്ട്രീയ നേതാവിനെ ഷൈന്‍ടോം ചാക്കോയും അവതരിപ്പിക്കുന്നു. ചിത്രത്തിനുവേണ്ടി തിരക്കഥ ഒരുക്കുന്നത് റാഫിയാണ്.
ജിബു ജേക്കബ്ബ്, ചിന്നു ചാന്ദിനി, സ്‌നേഹ ബാബു എന്നിവരാണ് മറ്റു കഥാപാത്രങ്ങളെ അവതരിപ്പിക്കുന്നത്.
വണ്‍ഡേ ഫിലിംസിന്റെ ബാനറില്‍ ബിജു വി. മത്തായിയാണ് ചിത്രം നിര്‍മ്മിക്കുന്നത്. കെ.ആര്‍. ജയകുമാര്‍, ബിജു എം.പി. എന്നിവരാണ് സഹ നിര്‍മ്മാതാക്കള്‍. വിഷ്ണു നാരായണന്‍ ഛായാഗ്രഹണം നിര്‍വ്വഹിച്ച ചിത്രത്തിന്റെ പ്രൊഡക്ഷന്‍ കണ്‍ട്രോളര്‍ ഡിക്‌സണ്‍ പൊടുത്താസാണ്. ഹരിദാസിന്റെ മകന്‍ ഋഷി ഹരിദാസ് സംവിധാന സഹായിയായും പ്രവര്‍ത്തിക്കുന്നു. ഗുഡ്‌വില്‍ എന്റര്‍ടെയിന്‍മെന്റ്‌സാണ് ചിത്രം പ്രദര്‍ശനത്തിനെത്തിക്കുന്നത്.
Recent Comments