ഇത്തവണ മോഹന്‍ലാല്‍ മുംബയില്‍ എത്തിയതിന് രണ്ട് ലക്ഷ്യങ്ങളുണ്ടായിരുന്നു. ബിഗ് ബോസിന്റെ ഗ്രാന്റ് ഫിനാലയില്‍ പങ്കെടുക്കുക മാത്രമായിരുന്നില്ല, താന്‍ അഭിനയിക്കാന്‍ പോകുന്ന ഏറ്റവും പുതിയ തെലുങ്ക് ചിത്രത്തിന്റെ ഫോട്ടോഷൂട്ടിലും പങ്കെടുക്കണമായിരുന്നു. മുംബയ് വൈ.ആര്‍.എഫ് സ്റ്റുഡോയില്‍വച്ചായിരുന്നു ഫോട്ടോഷൂട്ട്. ബാലാജി ടെലിഫിലിംസിന്റെ ബാനറില്‍ ഏക്ത കപൂര്‍ നിര്‍മ്മിക്കുന്ന വൃഷഭ എന്ന ചിത്രത്തിന്റെ പ്രീപ്രൊഡക്ഷന്റെ ഭാഗമായിട്ടായിരുന്നു ഫോട്ടോഷൂട്ട്. പ്രശസ്ത സംവിധായകന്‍ നന്ദകിഷോര്‍ സംവിധാനം ചെയ്യുന്ന ചിത്രമാണിത്. ഫോട്ടോഷൂട്ടില്‍ പങ്കുകൊള്ളാനല്ലെങ്കില്‍ കൂടിയും ഏക്ത കപൂറിന്റെ അച്ഛനും പ്രശസ്ത നടനുമായ ജിതേന്ദ്രയും സ്റ്റുഡിയോയില്‍ എത്തിയിരുന്നു. ജിതേന്ദ്രയുമായി ഏറെ നേരം സൗഹൃദം പങ്കിട്ടാണ് ലാല്‍ മടങ്ങിയത്.
കണക്ട് മീഡിയയും എ.വി. സ്റ്റുഡിയോസുമായി ചേര്‍ന്നാണ് ഏക്ത കപൂര്‍ ഈ ബിഗ് ബജറ്റ് ചിത്രം നിര്‍മ്മിക്കുന്നത്. 200 കോടിയാണ് വൃഷഭയുടെ ബജറ്റ്. തെലുങ്കിന് പുറമെ മലയാളം, തമിഴ്, ഹിന്ദി, കന്നഡ എന്നീ ഭാഷകളിലും ചിത്രം റിലീസിനെത്തും. വൃഷഭയുടെ ഷൂട്ടിംഗ് ജൂലൈ അവസാനത്തോടുകൂടി ആരംഭിക്കും. ആക്ഷന്‍ എന്റര്‍ടൈനറാണ് വൃഷഭ. വി.എഫ്.എക്‌സിനും ഏറെ പ്രാധാന്യം നല്‍കിക്കൊണ്ടാണ് ചിത്രം നിര്‍മ്മിക്കുന്നത്.
മനമന്‍തയും ജനതാഗ്യാരേജുമാണ് ഇതിനുമുമ്പ് മോഹന്‍ലാല്‍ അഭിനയിച്ചിട്ടുള്ള തെലുങ്ക് ചിത്രം. ഗണ്ഡീവം എന്ന ചിത്രത്തില്‍ ഒരു അതിഥി വേഷവും ചെയ്തിട്ടുണ്ട്.
Recent Comments