ഇന്ത്യയിലെ മുന്‍നിര നിര്‍മ്മാണ കമ്പനികളിലൊന്നായ ലൈക്കാ പ്രൊഡക്ഷന്‍സുമായി സംവിധായകന്‍ ജൂഡ് ആന്തണി ജോസഫ് കരാറില്‍ ഒപ്പുവച്ചു. ലൈക്കാ പ്രൊഡക്ഷന്‍സിന്റെ അടുത്ത ബിഗ് ബജറ്റ് ചിത്രം സംവിധാനം ചെയ്യുന്നത് ജൂഡ് ആന്തണി ജോസഫാണ്.
പ്രതിഭാശാലികളെ കണ്ടെത്തി മികച്ച ചിത്രങ്ങള്‍ നിര്‍മ്മിക്കുക എന്നത് ലൈക്കാ പ്രൊഡക്ഷന്‍സിന്റെ പ്രഖ്യാപിത ലക്ഷ്യങ്ങളില്‍ ഒന്നുകൂടിയാണ്. 2018 ന്റെ ഐതിഹാസികമായ വിജയമാണ് ലൈക്കാ പ്രൊഡക്ഷന്‍സിനെ ജൂഡ് ആന്തണി ജോസഫിന്റെ അടുക്കല്‍ എത്തിച്ചതും.
നേരത്തേ നിവിന്‍പോളിക്കുവേണ്ടി ഒരു സിനിമയുടെ തിരക്കഥ പൂര്‍ത്തിയായ വിവരം ജൂഡ് ആന്തണി തന്നെയാണ് മാധ്യമങ്ങളോട് വെളിപ്പെടുത്തിയത്. തൊട്ടുപിന്നാലെയാണ് സുഭാസ്‌കറിന്റെ ഉടമസ്ഥതയിലുള്ള ലൈക്കാ പ്രൊഡക്ഷന്‍സുമായി ജൂഡ് ആന്തണി എഗ്രിമെന്റ് സൈന്‍ ചെയ്തതും. ചിത്രത്തിന്റെ അനൗണ്‍സ്‌മെന്റ് വന്നതൊഴിച്ചാല്‍ മറ്റു വിവരങ്ങളൊന്നും ഔദ്യോഗികമായി സ്ഥിരീകരിക്കപ്പെട്ടിട്ടില്ല. പക്ഷേ അടുത്തിടെയാണ് ജൂഡ് ആന്തണി വിജയ് സേതുപതിയെയും കിച്ചാ സുദീപിനെയും കണ്ടിരുന്നത്. വിജയ് സേതുപതിയുമായുള്ള ഫോട്ടോ തന്റെ സോഷ്യല്‍പേജില്‍ ജൂഡ് പോസ്റ്റ് ചെയ്യുകയും ചെയ്തിരുന്നു. പുറത്തുവരുന്ന വിവരങ്ങളനുസരിച്ച് ജൂഡ് ആന്തണിയുടെ പുതിയ ചിത്രത്തില്‍ നിവിന്‍പോളിയും വിജയ് സേതുപതിയും കിച്ചാസുദീപിപും രഷ്മിക മന്ദാനയും ഭാഗമാകുമെന്നറിയുന്നു. ആഗസ്റ്റില്‍ ചിത്രീകരണം തുടങ്ങിയേക്കും.
Recent Comments