അരവിന്ദന്റെ അതിഥികള്‍ എന്ന ചിത്രത്തിനുശേഷം എം. മോഹനന്‍ സംവിധാനം ചെയ്യുന്ന ചിത്രമാണ് ഒരു ജാതി ജാതകം. ചിത്രത്തിന്റെ ഷൂട്ടിംഗ് ജൂലൈ 9 ന് കൊച്ചിയില്‍ ആരംഭിക്കും. വിനീത് ശ്രീനിവാസനാണ് നായകന്‍. ശ്രീനിവാസനും ചിത്രത്തില്‍ ഒരു കേന്ദ്രകഥാപാത്രത്തെ അവതരിപ്പിക്കുന്നു. ചിത്രീകരണം പൂര്‍ത്തിയായ കുറുക്കനിലും ഇവര്‍ ഒരുമിച്ച് അഭിനയിച്ചിരുന്നു. അജു വര്‍ഗീസും മൃദുല്‍ നായരുമാണ് കാസ്റ്റ് ചെയ്യപ്പെട്ട മറ്റ് താരങ്ങള്‍. ഇവര്‍ക്ക് പുറമേ നിരവധി പ്രമുഖ താരങ്ങളും ഏതാനും പുതുമുഖങ്ങളും ചിത്രത്തിന്റെ ഭാഗമാകും.
വര്‍ണ്ണ ചിത്രയുടെ ബാനറില്‍ മഹാ സുബൈറാണ് ചിത്രം നിര്‍മ്മിക്കുന്നത്. കുറുക്കന്റെയും നിര്‍മ്മാതാവ് സുബൈറായിരുന്നു. രാകേഷ് മണ്ടോടിയാണ് കഥയും തിരക്കഥയും സംഭാഷണവും എഴുതുന്നത്. ബേസില്‍ ജോസഫ് സംവിധാനം ചെയ്ത ‘ഗോദ’യുടെ തിരക്കഥാകൃത്താണ് രാകേഷ് മണ്ടോടി.
മനു മഞ്ജിത്തിന്റെ വരികള്‍ക്ക് ഗുണബാലസുബ്രഹ്‌മണ്യം ഈണം പകര്‍ന്നിരിക്കുന്നു. വിശ്വജിത്ത് ഒടുക്കത്തിലാണ് ഛായാഗ്രാഹകന്‍. എഡിറ്റിംഗ് രഞ്ജന്‍ ഏബ്രഹാം, കലാസംവിധാനം ജോസഫ് നെല്ലിക്കല്‍, മേക്കപ്പ് ഷാജി പുല്‍പ്പള്ളി, കോസ്റ്റ്യൂം ഡിസൈന്‍ സുജിത് മട്ടന്നൂര്‍, ക്രിയേറ്റീവ് കോണ്‍ട്രിബ്യൂട്ടര്‍ സുരേഷ് ഇരിങ്ങല്‍, നിര്‍മ്മാണ നിര്‍വഹണം ഷെമീജ് കൊയിലാണ്ടി, എക്‌സിക്കുട്ടീവ് പ്രൊഡ്യൂസര്‍ സൈനുദ്ദീന്‍, പി.ആര്‍.ഒ. വാഴൂര്‍ ജോസ്.
കണ്ണൂരാണ് ചിത്രത്തിന്റെ മറ്റൊരു പ്രധാന ലൊക്കേഷന്‍. കൊച്ചിയിലും കണ്ണൂരിലുമായി ചിത്രീകരണം പൂര്‍ത്തിയാകും.
Recent Comments