ടൊവിനോ തോമസിനെ നായകനാക്കി ലാല്‍ ജൂനിയര്‍ സംവിധാനം ചെയ്യുന്ന
നടികര്‍തിലകത്തിന്റെ ചിത്രീകരണം കൊച്ചിയില്‍ ആരംഭിച്ചു. കാക്കനാട് ഷെറട്ടണ്‍ ഹോട്ടലില്‍ വച്ചായിരുന്നു ചിത്രത്തിന്റെ പൂജ. ലാല്‍ ജൂനിയറിന്റെ മാതാപിതാക്കളായ നാന്‍സിയും ലാലും ഭദ്രദീപം തെളിയിച്ചാണ് ചടങ്ങുകള്‍ക്ക് തുടക്കം കുറിച്ചത്.
സൂപ്പര്‍ഹിറ്റ് ചിത്രം ഡ്രൈവിംഗ് ലൈസന്‍സിനു ശേഷം ലാല്‍ ജൂനിയര്‍ സംവിധാനം ചെയ്യുന്ന ചിത്രംകൂടിയാണ് ഇത്. ഡേവിഡ് പടിക്കല്‍ എന്ന സൂപ്പര്‍ താരത്തിന്റെ കഥയാണ് ചിത്രം പറയുന്നത്. ടൊവിനോ തോമസാണ് ഡേവിഡ് പടിക്കല്‍ എന്ന കേന്ദ്ര കഥാപാത്രത്തെ അവതരിപ്പിക്കുന്നത്. ഡേവിഡ് പടിക്കലിന്റെ അഭിനയ ജീവിതത്തില്‍ അപ്രതീക്ഷിതമായി അരങ്ങേറുന്ന ചില സംഭവങ്ങളും അതു തരണം ചെയ്യാനുള്ള ശ്രമങ്ങളുമാണ് ചിത്രത്തിന്റെ ഇതിവൃത്തം.
ഭാവനയാണ് നായിക. സൗബിന്‍ ഷാഹിര്‍, ധ്യാന്‍ ശ്രീനിവാസന്‍, അനൂപ് മേനോന്‍, രഞ്ജിത്ത്, ലാല്‍, ബാലു വര്‍ഗീസ്, ഇന്ദ്രന്‍സ്, സുരേഷ് കൃഷ്ണ, മധുപാല്‍, ഗണപതി, അല്‍ത്താഫ് സലിം, മണിക്കുട്ടന്‍, സഞ്ജു ശിവറാം, ജയരാജ് കോഴിക്കോട്, ഖാലിദ് റഹ്‌മാന്‍, അഭിരാം പൊതുവാള്‍, ബിപിന്‍ ചന്ദ്രന്‍, അറിവ്, മനോഹരി ജോയ്, മാലാ പാര്‍വ്വതി, ദേവികാഗോപാല്‍, ബേബി ആരാധ്യ, അഖില്‍ കണ്ണപ്പന്‍, ജസീര്‍ മുഹമ്മദ്, രജിത്ത്, ഖയസ് മുഹമ്മദ് എന്നിവര്‍ക്കൊപ്പം നിരവധി പുതുമുഖങ്ങളും ചിത്രത്തില്‍ അഭിനയിക്കുന്നു.
ഗോഡ് സ്പീഡ് ആന്റ് മൈത്രിമൂവി മേക്കേഴ്‌സിന്റെ ബാനറില്‍ നവീന്‍ യേര്‍നേനി, വൈ. രവിശങ്കര്‍, അലന്‍ ആന്റെണി, അനൂപ് വേണുഗോപാല്‍, എന്നിവരാണ് ഈ ചിത്രം നിര്‍മ്മിക്കുന്നത്. ഇന്ത്യയിലെ വന്‍കിട ചലച്ചിത്രനിര്‍മ്മാണ കമ്പനിയാണ് മൈത്രിമൂവി മേക്കേഴ്സ്. ഗോഡ് സ്പീഡ് കമ്പനിയുമായി സഹകരിച്ചു കൊണ്ടുള്ള അവരുടെ ആദ്യത്തെ മലയാള സംരംഭമാണ് നടികര്‍ തിലകം.
നാല്‍പ്പതുകോടിയാണ് ചിത്രത്തിന്റെ ബജറ്റ്. അമ്പതോളം വരുന്ന താരനിരക്കാര്‍ ചിത്രത്തിന്റെ ഭാഗമാകും. നൂറു ദിവസത്തെ ചിത്രീകരണമാണ് പ്ലാന്‍ ചെയ്തിരിക്കുന്നത്. കൊച്ചി, ഹൈദ്രാബാദ്, കാഷ്മീര്‍, ദുബായ് എന്നിവയാണ് പ്രധാന ലൊക്കേഷനുകള്‍.
രചന സുവിന്‍ സോമശേഖരന്‍, സംഗീതം യാക്‌സിന്‍ നെഹാ പെരേര, ഛായാഗ്രഹണം ആല്‍ബി, എഡിറ്റിംഗ് രതീഷ് രാജ്, കലാസംവിധാനം പ്രശാന്ത് മാധവ്, പ്രൊഡക്ഷന്‍ കണ്‍ട്രോളര്‍ മനോജ് കാരന്തൂര്‍, മേക്കപ്പ് ആര്‍.ജി. വയനാടന്‍, കോസ്റ്റ്യൂം ഡിസൈന്‍ യെക്താ ഭട്ട്, ചീഫ് അസ്സോസ്സിയേറ്റ് ഡയറക്ടര്‍ നിധിന്‍ മൈക്കിള്‍, പ്രൊഡക്ഷന്‍ മാനേജര്‍ ശരത് പത്മാനാഭന്‍, പ്രൊഡക്ഷന്‍ എക്‌സിക്കുട്ടീവ് നസീര്‍ കാരന്തൂര്‍, പി.ആര്‍.ഒ വാഴൂര്‍ ജോസ്, ഫോട്ടോ വി.വി. ആന്റണി.
Recent Comments