നാഗ് അശ്വിന്റെ സംവിധാനത്തില്‍ പ്രഭാസ് പ്രധാന വേഷത്തിലെത്തുന്ന ചിത്രത്തിന് കല്‍ക്കി 2898 എഡി എന്ന് പേരിട്ടു. പ്രോജക്ട് കെ എന്ന പേരിലാണ് ചിത്രം അനൗണ്‍സ് ചെയ്യപ്പെട്ടത്. പ്രഖ്യാപനം മുതല്‍ വാര്‍ത്തകളില്‍ ഇടംപിടിച്ച ചിത്രമാണിത്. സ്റ്റാര്‍ കാസ്റ്റിംഗായിരുന്നു ചിത്രത്തിന്റെ പ്രധാന ഹൈലൈറ്റായത്. പ്രഭാസിന് പുറമെ അമിതാഭ് ബച്ചന്‍, കമല്‍ ഹാസന്‍, ദീപിക പദുകോണ്‍ തുടങ്ങിയവര്‍കൂടി ചിത്രത്തിന്റെ ഭാഗമായതോടെയാണ് പ്രോജക്ട് കെ അന്തര്‍ദ്ദേശീയതലത്തിലും ശ്രദ്ധിക്കപ്പെടാന്‍ തുടങ്ങിയത്. പ്രശസ്തമായ സാന്‍ ഡിയാഗോ കോമികോണില്‍ ചിത്രം റിലീസ് ചെയ്യും. ഈ നേട്ടം സ്വന്തമാക്കുന്ന ആദ്യ ഇന്ത്യന്‍ചിത്രം കൂടിയാണിത്. ഇതിനിടെ കഴിഞ്ഞ ദിവസം ചിത്രത്തിന്റെ പ്രൊമോ വീഡിയോ റിലീസ് ചെയ്തിരുന്നു. മണിക്കൂറുകള്‍ക്കുള്ളില്‍ വീഡിയോ യൂട്യൂബില്‍ ട്രെന്‍ഡിങ്ങായി.
വന്‍ പ്രതീക്ഷ വച്ചുപുലര്‍ത്തുന്ന ചിത്രമാണെങ്കിലും ഫസ്റ്റ് ലുക്ക് പോസ്റ്റര്‍ പുറത്ത് വിട്ടതിന് പിന്നാലെ പ്രഭാസിന്റെ സോഷ്യല്‍ മീഡിയ പേജ്, ട്രോളുകള്‍ കൊണ്ട് നിറഞ്ഞിരുന്നു. ഏതോ ഹോളിവുഡ് സയന്‍സ് ഫിക്ഷന്‍ സിനിമയുടെ പോസ്റ്ററില്‍ പ്രഭാസിന്റെ മുഖം കട്ട് ചെയ്ത് വെച്ചതുപോലെ ആണെന്നാണ് ട്രോളന്‍മരുടെ പക്ഷം. അയേണ്‍ മാനിന്റെ ലുക്ക് കോപ്പി അടിച്ച താണെന്നും മറ്റൊരു വിഭാഗം ആരോപിക്കുന്നു.
പക്ഷേ പ്രൊമോ വീഡിയോ ഇറങ്ങിയതോടെ മറ്റൊരു ഹൈപ്പ് ചിത്രത്തിന് കൈവന്നിരിക്കുകയാണ്.
Recent Comments