ധനുഷ് നായകനായെത്തുന്ന ‘ക്യാപ്റ്റന്‍ മില്ലര്‍’ സിനിമയുടെ ടീസര്‍ പുറത്തിറങ്ങി. അരുണ്‍ മാതേശ്വരന്‍ തിരക്കഥയൊരുക്കി സംവിധാനം ചെയ്യുന്ന ചിത്രം ധനുഷിന്റെ കരിയറിലെ ഏറ്റവും വലിയ ചിത്രങ്ങളിലൊന്നാണ്. സത്യജ്യോതി ഫിലിംസിന്റെ ബാനറില്‍ ടി ജി ത്യാഗരാജനാണ് ചിത്രം അവതരിപ്പിക്കുന്നത്. ധനുഷിന്റെ 47-ാമത് ചിത്രമാണ് ക്യാപ്റ്റന്‍ മില്ലര്‍.
ചിത്രത്തില്‍ വിപ്ലവകാരിയായ നായകനെയാണ് ധനുഷ് അവതരിപ്പിക്കുന്നത്. ഒതുക്കി കെട്ടിയ മുടിയും നീട്ടിവളര്‍ത്തിയ താടിയും ധനുഷിന് പുതിയ ലുക്ക് നല്‍കുന്നുണ്ട്. ബ്രിട്ടീഷുകാര്‍ക്കെതിരെ പോരാടുന്ന കഥാപാത്രമാണ് ധനുഷിന്റേത്. ചിത്രം തീയേറ്ററുകളില്‍ തീപ്പൊരി മിന്നിക്കുമെന്ന സൂചനയാണ് ടീസര്‍ നല്‍കുന്നത്. ഈ വര്‍ഷം ഡിസംബര്‍ 15 നാണ് ചിത്രം തീയേറ്ററുകളിലെത്തുക.
സെന്തില്‍ ത്യാഗരാജനും അര്‍ജുന്‍ ത്യാഗരാജനുമാണ് ചിത്രം പ്രൊഡ്യൂസ് ചെയ്യുന്നത്. കന്നഡ സൂപ്പര്‍താരം ശിവരാജ് കുമാര്‍, തെലുങ്ക് താരം സുന്ദീപ് കിഷന്‍, പ്രിയങ്കാ മോഹന്‍ എന്നിവര്‍ ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നു.
ഡിഒപി- സിദ്ധാര്‍ത്ഥ നൂനി, സ്റ്റണ്ട്- ദിലീപ് സുബ്ബരായന്‍, എഡിറ്റര്‍- നാഗൂരന്‍ രാമചന്ദ്രന്‍ എന്നിവരാണ്. മദന്‍ കര്‍ക്കിയാണ് സംഭാഷണം ഒരുക്കിയിരിക്കുന്നത്. ജി വി പ്രകാശ് കുമാര്‍ സംഗീത സംവിധാനവും സൗണ്ട് മിക്‌സിങ് രാജാ കൃഷ്ണനുമാണ് . ധനുഷിന്റെ പിറന്നാള്‍ ആഘോഷങ്ങള്‍ക്കു തുടക്കം കുറിച്ചുകൊണ്ടാണ് ചിത്രത്തിന്റെ അണിയറ പ്രവര്‍ത്തകര്‍ ടീസര്‍ പുറത്തുവിട്ടിരിക്കുന്നത്.
ഇതുവരെ 12 ദശലക്ഷം ആളുകളാണ് ടീസര്‍ കണ്ടിരിക്കുന്നത്. ചിത്രം വലിയ വിജയം സമ്മാനിക്കട്ടെ എന്നാണ് ആരാധകര്‍ ആശംസിക്കുന്നത്.
Recent Comments