നൈറ്റ് ഷിഫ്റ്റ് സ്റ്റുഡിയോസിന്റെ ബാനറില്‍ നിര്‍മ്മിക്കുന്ന ആദ്യ ചിത്രത്തിന്റെ ഷൂട്ടിംഗ് ഇന്ന് എറണാകുളത്ത് ആരംഭിച്ചു. മമ്മൂട്ടിയാണ് നായകന്‍. രാഹുല്‍ സദാശിവന്‍ രചനയും സംവിധാനവും നിര്‍വ്വഹിക്കുന്ന ചിത്രംകൂടിയാണ് ഭ്രമയുഗം.
‘കേരളത്തിന്റെ ഇരുണ്ട കാലഘട്ടത്തില്‍ വേരൂന്നിയ കഥയാണ് ചിത്രം പറയുന്നത്. ഇത് ആഴത്തിലുള്ള ചലച്ചിത്ര അനുഭവമാക്കി മാറ്റുന്നതിന് നിര്‍മ്മാതാക്കളുടെ പിന്തുണ ലഭിച്ചതില്‍ എനിക്ക് സന്തോഷമുണ്ട്. ലോകമെമ്പാടുമുള്ള മമ്മൂക്കയുടെ ആരാധകര്‍ക്ക് ഇതൊരു വിരുന്നായിരിക്കും. മമ്മൂക്കയെ വച്ച് സംവിധാനം ചെയ്യുക എന്ന സ്വപ്‌നം യാഥാര്‍ത്ഥ്യമായതിന്റെ സന്തോഷത്തിലുമാണ് ഞാന്‍.’ സംവിധായകന്‍ രാഹുല്‍ സദാശിവന്‍ പറയുന്നു.
വൈനോട്ട് സ്റ്റുഡിയോയുടെ കീഴില്‍ ഹൊറര്‍-ത്രില്ലര്‍ വിഭാഗത്തിലുള്ള സിനിമകള്‍ നിര്‍മ്മിക്കാന്‍ മാത്രമായി പ്രത്യേകം രൂപീകരിച്ച പ്രൊഡക്ഷന്‍ ഹൗസാണ് നൈറ്റ് ഷീഫ്റ്റ് സ്റ്റുഡിയോസ്.
‘ഹൊറര്‍ സിനിമകളോടുള്ള എന്റെ ഇഷ്ടമാണ് ഇങ്ങനെയൊരു പ്രൊഡക്ഷന്‍ ഹൗസ് തുടങ്ങാന്‍ പ്രചോദനമായത്. ആദ്യ സിനിമയിലെ നായകനായി മമ്മൂട്ടി എത്തിയതിലും അതിയായ സന്തോഷമുണ്ട്. ആഗോള പ്രശസ്തരായ നിരവധി സംവിധായകര്‍ക്ക് കീഴില്‍ വ്യത്യസ്തമായ ഹൊറര്‍-ത്രില്ലര്‍ ചിത്രങ്ങള്‍ നിര്‍മ്മിക്കുക എന്നുള്ളതാണ് കമ്പനിയുടെ ലക്ഷ്യം.’ നൈറ്റ് ഷിഫ്റ്റ് സ്റ്റുഡോസിന്റെ സ്ഥാപകനും നിര്‍മ്മാതാവുമായ ചക്രവര്‍ത്തി രാമചന്ദ്രന്‍ പറഞ്ഞു.
അര്‍ജുന്‍ അശോകന്‍, സിദ്ധാര്‍ത്ഥ് ഭരതന്‍, അമല്‍ ദലിസ് എന്നിവരാണ് ചിത്രത്തിലെ മറ്റു താരങ്ങള്‍. ഷെഹനാദ് ജലാല്‍ ഛായാഗ്രഹണം നിര്‍വ്വഹിക്കുന്ന ചിത്രത്തിന്റെ പ്രൊഡക്ഷന്‍ ഡിസൈനര്‍ ജോതിഷ് ശങ്കറാണ്. എഡിറ്റര്‍ ഷഫീക്ക് മുഹമ്മദ് അലി, സംഗീതം ക്രിസ്റ്റോ സേവ്യര്‍, സംഭാഷണം ടി.ഡി. രാമകൃഷ്ണന്‍, മേക്കപ്പ് റോണക്‌സ് സേവ്യര്‍. കോസ്റ്റിയൂം മെല്‍വി ജെ.
മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിലും ചിത്രം മൊഴിമാറ്റം ചെയ്യും. 2024 ല്‍ ചിത്രം തീയേറ്ററുകളില്‍ പ്രദര്‍ശനത്തിനെത്തിക്കാനാണ് ലക്ഷ്യമിടുന്നത്. കൊച്ചിക്ക് പുറമെ ഒറ്റപ്പാലമാണ് ഭ്രമയുഗത്തിന്റെ മറ്റൊരു പ്രധാന ലൊക്കേഷന്‍.
Recent Comments