പാചക വിദഗ്ദനും സിനിമ നിര്‍മാതാവും ആയിരുന്ന നൗഷാദിന്റെ മകളാണ് നശ്വ നൗഷാദ്. നശ്വയുടെ അമ്മ ഷീബ ഹൃദയാഘാതത്തെ തുടര്‍ന്ന് രണ്ട് വര്‍ഷങ്ങള്‍ക്കുമുമ്പ് മരണപെട്ടിരുന്നു. രണ്ടാഴ്ച്ചക്കിപ്പുറം നൗഷാദും അസുഖബാധിതനായി ലോകത്തോട് വിടപറഞ്ഞു. മാതാപിതാക്കളുടെ വിയോഗത്തെ തുടര്‍ന്ന് നശ്വയുടെ സംരക്ഷണം ബന്ധുക്കള്‍ ഏറ്റെടുത്തു. ഇപ്പോള്‍ പുറത്തുവരുന്നത് ബന്ധുക്കള്‍ക്കെതിരെ നശ്വ നടത്തിയിരിക്കുന്ന ഗുരുതരമായ ആരോപണങ്ങളാണ്.
തിരുവല്ല സര്‍ക്കിള്‍ ഇന്‍സ്‌പെക്ട്ടര്‍ക്ക് നല്കിയ പരാതിയുടെ കോപ്പി നശ്വ തന്റെ ഫേസ്ബുക്ക് പേജിലൂടെ പങ്കുവെച്ചിട്ടുണ്ട്. പരാതിയില്‍ പറയുന്നതനുസരിച്ച്, തനിക്ക് വിദ്യാഭ്യാസ ചിലവിനു പോലും പണം തരാതെ തന്റെ സ്വത്തുക്കള്‍ ബന്ധുക്കള്‍ കൈയ്യടക്കി വച്ചിരിക്കുന്നുവെന്നാണ്. കോടതിയില്‍നിന്ന് തന്റെ ഗാര്‍ഡിയന്‍ഷിപ്പ് ഏറ്റെടുത്ത് പിതാവിന്റെ കേറ്ററിങ്ങ് ബിസിനസ്സ് അടക്കം എല്ലാ സ്വത്തുക്കളും അവര്‍ കൈയ്യടക്കി വച്ചിരിക്കുകയാണെന്നും നശ്വ പരാതിയില്‍ ആരോപിക്കുന്നു. ഇതില്‍ നിന്നുള്ള വരുമാനംകൊണ്ട് അവരുടെ മക്കള്‍ക്ക് എല്ലാ സൗകര്യങ്ങളും ചെയ്യ്ത് കൊടുക്കുകയും, തനിക്ക് വേണ്ട അടിസ്ഥാന ആവശ്യങ്ങള്‍ക്ക് പോലും പണം ചെലവാക്കാതിരിക്കുകയും ചെയ്യുന്നു. തന്നെ സൗജന്യമായി പഠിപ്പിക്കണം എന്ന് ആവിശ്യപെട്ട് സ്‌കൂളുകളില്‍ കയറി ഇറങ്ങുന്നു. തന്റെ മാതാപിതാക്കള്‍ ഇതല്ല ആഗ്രഹിച്ചത്. വാപ്പയുടെ കേറ്ററിങ്ങ് ബിസിനസ്സ് തനിക്ക് സംരക്ഷിക്കണമെന്നും അതുമായി മുന്നോട്ട് പോകണമെന്നും നശ്വ പരാതിയില്‍ ആവശ്യപ്പെട്ടിട്ടുണ്ട്.
പാചക വിദഗ്ദന്‍ എന്ന നിലയിലാണ് നൗഷാദ് പ്രശസ്തനാകുന്നത്. പിന്നീട് സിനിമാ നിര്‍മ്മാതാവായി. കാഴ്ച്ച, ചട്ടമ്പിനാട്, ബെസ്റ്റ് ആക്ടര്‍, ലയണ്‍, പയ്യന്‍സ്, സ്പാനിഷ് മസാല എന്നീ സിനിമകള്‍ നിര്‍മ്മിച്ചു. സ്പാനിഷ് മസാല എന്ന സിനിമയുടെ പരാജയം വന്‍ സാമ്പത്തിക ബാദ്ധ്യത അദ്ദേഹത്തിന് വരുത്തിവച്ചു. കടബാദ്ധ്യതകളും ഭാര്യയുടെ പെട്ടന്നുള്ള മരണവുമാണ് അദ്ദേഹത്തെ അകാല വിയോഗത്തിലേക്ക് എത്തിച്ചത്. വാപ്പയുടെ വിയോഗത്തിനു ശേഷമുണ്ടായ മകളുടെ ഈ ദുരനുഭവം ഇപ്പോള്‍ സോഷ്യല്‍ മീഡിയയില്‍ വന്‍ ചര്‍ച്ചയാവുകയാണ്.
Recent Comments