നെറ്റ് ഫ്‌ളിക്‌സിലെ ജനപ്രിയ വെബ് സീരീസുകളിലൊന്നാണ് മണി ഹെയ്സ്റ്റ്. അഞ്ച് സീസണുകളിലായി ഇതുവരെ 41 എപ്പിസോഡുകളാണ് ഈ വെബ് സീരീസിന്റേതായി പുറത്ത് വന്നത്. അതിലെ കഥാപാത്രങ്ങളായ പ്രൊഫസറിനും ടോക്കിയോയ്ക്കും നെയ്‌റോബിക്കുമെല്ലാം നിരവധി ആരാധകര്‍ കേരളത്തിലുമുണ്ട്. മണി ഹെയ്സ്റ്റ് എന്നാല്‍ പണക്കൊള്ള എന്നാണ് അര്‍ത്ഥം. സ്പാനിഷ് സീരീസായ ഇത് ഒരു ക്രൈം ത്രില്ലര്‍ ഡ്രാമ കൂടിയാണ്.
സമാനമല്ലെങ്കിലും പ്രവാസി കൊള്ളക്കഥ പറയുന്ന രാമചന്ദ്ര ബോസ് ആന്റ് കോ എന്ന ചിത്രം പ്രദര്‍ശനത്തിന് ഒരുങ്ങുകയാണ്. ഹനീഫ് അദേനി സംവിധാനം ചെയ്യുന്ന ചിത്രത്തിലെ നായകന്‍ നിവിന്‍പോളിയാണ്. ജാഫര്‍ ഇടുക്കി, വിനയ് ഫോര്‍ട്ട്, വിജിലേഷ്, ശ്രീനാഥ് ബാബു, മമിത ബൈജു എന്നിവരാണ് മറ്റ് താരങ്ങള്‍.
ബോസ് ആന്റ് കോ എന്ന പ്രവാസി കൊള്ളക്കഥയിലെ താരങ്ങള്‍ മണി ഹൈസ്റ്റിലെ കഥാപാത്രങ്ങളായാല്‍ എങ്ങനെയുണ്ടാകും. ഈ ആശയത്തില്‍നിന്നാണ് നിവിന്‍ അടക്കമുള്ള താരങ്ങള്‍ വേഷപ്പകര്‍ച്ചയിലൂടെ അത്ഭുതം കാട്ടിയിരിക്കുന്നത്. പ്രൊഫസറായി നിവിന്‍പോളിയും റിയോയായി വിജിലേഷും, ഹെല്‍സിങ്കിയായി ജാഫര്‍ ഇടുക്കിയും ടോക്കിയോയായി മമിത ബൈജുവും ബെര്‍ലിനായി വിനയ് ഫോര്‍ട്ടും നെയ്‌റോബിയായി ആര്‍ഷാ ബൈജുവും ഡെന്‍വറായി ശ്രീനാഥ് ബാബുവും മേക്കോവര്‍ നടത്തി. വളരെ രസകരമായാണ് രാമചന്ദ്ര ബോസ് ആന്റ് കോ താരങ്ങളുടെ മണി ഹെയ്സ്റ്റ് ഔട്ട്‌ലുക്കില്‍ എത്തിയിരിക്കുന്നത്.
യുഎഇയും കേരളത്തിലുമായി ചിത്രീകരണം പൂര്‍ത്തിയാക്കിയ രാമചന്ദ്ര ബോസ് ആന്റ് കോ ഓണം റിലീസായി തീയേറ്ററുകളില്‍ എത്തും.
Recent Comments