ഓസ്‌കാര്‍ ജേതാവ് റസൂല്‍ പൂക്കുട്ടി ആദ്യമായി സംവിധാനം ചെയ്യുന്ന മലയാള ചിത്രം ‘ഒറ്റ’യുടെ റിലീസ് തീയതി പ്രഖ്യാപിച്ചു. ഒക്ടോബര്‍ 27 ന് ചിത്രം തീയറ്ററുകളില്‍ പ്രദര്‍ശനത്തിനെത്തും. ആസിഫ് അലി നായകനായ ചിത്രത്തില്‍
മലയാളം-തമിഴ്-കന്നഡ സിനിമകളിലെ മുന്‍നിരതാരങ്ങള്‍ അണിനിരക്കുന്നു. ബിഗ് ബഡ്ജറ്റില്‍ ഒരുങ്ങുന്ന ചിത്രം ചില്‍ഡ്രന്‍ റീ യുണൈറ്റഡ് എല്‍എല്‍പിയുടെയും റസൂല്‍ പൂക്കുട്ടി പ്രൊഡക്ഷന്‍സിന്റെയും ബാനറില്‍ എസ്. ഹരിഹരനാണ് നിര്‍മ്മിക്കുന്നത്. യഥാര്‍ത്ഥ സംഭവങ്ങളെ അടിസ്ഥാനമാക്കി ഒരുക്കിയ ചിത്രത്തിന്റെ തിരക്കഥ രചിച്ചിയിരിക്കുന്നത് കിരണ്‍ പ്രഭാകറാണ്.
അര്‍ജ്ജുന്‍ അശോകന്‍, സത്യരാജ്, ഇന്ദ്രജിത്ത്, ആദില്‍ ഹുസൈന്‍, ഇന്ദ്രന്‍സ്, രഞ്ജി പണിക്കര്‍, മേജര്‍ രവി, സുരേഷ് കുമാര്‍, ശ്യാമ പ്രസാദ്, സുധീര്‍ കരമന, ബൈജു പൂക്കുട്ടി, ദിവ്യ ദത്ത, രോഹിണി, കന്നഡ നടി ഭാവന, ലെന, മംമ്ത മോഹന്‍ദാസ്, ജലജ, ദേവി നായര്‍ എന്നിവരും ചിത്രത്തില്‍ അഭിനയിക്കുന്നു.
രണ്ട് യുവാക്കളുടെ ആവേശകരമായ കഥയും അവരുടെ അപ്രതീക്ഷിതമായ ഭാവിയിലേക്കുള്ള യാത്രയുമാണ് ചിത്രം പറയുന്നത്. ഒരു ഫാമിലി ഡ്രാമയാണ് ‘ഒറ്റ’ മാതാപിതാക്കളുമായുള്ള തര്‍ക്കത്തെ തുടര്‍ന്ന്, ഹരിയും ബെന്നും വീടുവിട്ട് ഒരു യാത്ര ആരംഭിക്കുന്നു. പിന്നീട് അവരുടെ ജീവിതം നിയന്ത്രണാതീതമായി പോകുന്നു. ഒടുവില്‍ ജീവിതം വഴുതിപ്പോകുന്നു എന്ന തിരിച്ചറിവ് അവര്‍ക്കുണ്ടാകുന്നു. ചിത്രത്തിലെ പ്രധാന കഥാപാത്രങ്ങളായ ഹരിയെ ആസിഫ് അലിയും ബെന്നിയെ അര്‍ജുന്‍ അശോകനും രാജുവിനെ ഇന്ദ്രജിത്തും വേഷമിടുന്നു.
വൈരമുത്തു, റഫീക്ക് അഹമ്മദ് എന്നിവരുടെ വരികള്‍ക്ക് എം. ജയചന്ദ്രന്‍ സംഗീതമൊരുക്കുന്നു. എം. ജയചന്ദ്രന്‍, പി ജയചന്ദ്രന്‍, ശ്രേയ ഘോഷാല്‍, ശങ്കര്‍ മഹാദേവന്‍, ജാസി ഗിഫ്റ്റ്, ബെന്നി ദയാല്‍, അല്‍ഫോന്‍സ് തുടങ്ങിയവരാണ് ഒറ്റയിലെ ഗാനങ്ങള്‍ ആലപിച്ചിരിക്കുന്നത്. അരുണ്‍ വര്‍മ്മയാണ് ഛായാഗ്രാഹകന്‍. ക്രിയേറ്റീവ് പ്രൊഡ്യൂസര്‍ കുമാര്‍ ഭാസ്‌കര്‍. റസൂല്‍ പൂക്കുട്ടി, വിജയകുമാര്‍ എന്നിവര്‍ ചേര്‍ന്നാണ് സൗണ്ട് ഡിസൈന്‍ കൈകാര്യം ചെയ്തിരിക്കുന്നത്. എഡിറ്റര്‍ സിയാന്‍ ശ്രീകാന്ത്, എക്‌സിക്യൂട്ടീവ് പ്രൊഡ്യൂസേഴ്‌സ് അരോമ മോഹന്‍, വി. ശേഖര്‍, പ്രൊഡക്ഷന്‍ ഡിസൈനര്‍ സിറില്‍ കുരുവിള, സൗണ്ട് മിക്‌സ് കൃഷ്ണനുണ്ണി കെ.ജെ, ബിബിന്‍ ദേവ്. ആക്ഷന്‍ കൊറിയോഗ്രാഫര്‍ ഫീനിക്‌സ് പ്രഭു, കോസ്റ്റ്യൂം റിതിമ പാണ്ഡെ. മേയ്ക്കപ്പ് രതീഷ് അമ്പാടി, പ്രൊഡക്ഷന്‍ മാനേജര്‍ ഹസ്മീര്‍ നേമം, സ്റ്റില്‍സ് സലീഷ് പെരിങ്ങോട്ടുകര, പബ്ലിസിറ്റി ഡിസൈനര്‍ കെ. മുരളീധരന്‍. കളറിസ്‌റ് ലിജു പ്രഭാകര്‍, അസോസിയേറ്റ് ഡയറക്ടേഴ്‌സ് ബോസ് വാസുദേവന്‍, ഉദയ് ശങ്കരന്‍. പി.ആര്‍.ഒ. മഞ്ജു ഗോപിനാഥ്.
സെഞ്ച്വറി ഫിലിംസാണ് ‘ഒറ്റ’ കേരളത്തിലെ തീയേറ്ററുകളിലെത്തിക്കുന്നത്.
Recent Comments