ഏറെ പ്രതീക്ഷയോടെ പ്രേക്ഷകര്‍ കാത്തിരിക്കുന്ന ചിത്രങ്ങളിലൊന്നാണ് സംവിധായകന്‍ ശങ്കറുമായി കമല്ഹാസന് വീണ്ടും ഒന്നിക്കുന്ന ഇന്ത്യന്‍ 2. ചിത്രം ഇപ്പോള്‍ പോസ്റ്റ് പ്രൊഡക്ഷന്‍ ഘട്ടത്തിലാണ്. ഡബ്ബിംഗിനായി കമലഹാസന്‍ ശങ്കറിനൊപ്പം ചെന്നൈയിലെ മാജിക് ലാന്റേണ്‍ സ്റ്റുഡിയോയില്‍ എത്തിയിരിക്കുകയാണ്. ഡബ്ബിംഗ് സ്റ്റുഡിയോയില്‍ നിന്നുള്ള ചെറിയ ഒരു വീഡിയോയും നിര്‍മാതാക്കാള്‍ പുറത്തുവിട്ടിട്ടുണ്ട്.
എആര്‍ റഹ്‌മാന്‍ ചിട്ടപ്പെടുത്തിയ ഇന്ത്യന്‍ ആദ്യ ഭാഗത്തിന്റെ തീം മ്യൂസികാണ് വീഡിയോയിലുള്ളത്. എന്നാല്‍ അനിരുദ്ധ് രവിചന്ദറാണ് ഇന്ത്യന്‍ 2 വിന്റെ സംഗീതം ഒരുക്കുന്നത്. ലൈക്ക പ്രൊഡക്ഷന്‍സിന്റെ ബാനറില്‍ സുബാസ്‌കരനും റെഡ് ജയന്റ് മൂവീസിന്റെ ബാനറില്‍ ഉദയനിധി സ്റ്റാലിനുമാണ് ചിത്രം നിര്‍മ്മിക്കുന്നത്.
സിദ്ധാര്‍ത്ഥ്, കാജല്‍ അഗര്‍വാള്‍, രാകുല്‍ പ്രീത് സിംഗ്, പ്രിയ ഭവാനി ശങ്കര്‍, കാളിദാസ് ജയറാം, ഗുല്‍ഷന്‍ ഗ്രോവര്‍, ബോബി സിംഹ തുടങ്ങി നിരവധി താരങ്ങള്‍ ചിത്രത്തിലുണ്ട്. VFX ഫ്രെയിമുകള്‍ അധികമുള്ള ചിത്രത്തില്‍ ഹോളിവുഡില്‍ നിന്നുള്ള നിരവധി സാങ്കേതിക വിദഗ്ധര്‍ അണിനിരക്കുന്നു. ഷൂട്ടിങ്ങ് പൂര്‍ത്തിയായ ചിത്രത്തിന്റെ റിലീസ് 2024 -ല്‍ ആയിരിക്കും.
അഴിമതിക്കും കുറ്റകൃത്യങ്ങള്‍ക്കും എതിരെ പോരാടാന്‍ ജാഗരൂകനായി മാറിയ പഴയ സ്വാതന്ത്ര്യ സമര സേനാനിയായ സേനാപതി എന്ന കഥാപാത്രത്തെയാണ് കമല്ഹാസന് വീണ്ടും അവതരിപ്പിക്കുന്നത്. 1996-ല്‍ പുറത്തിറങ്ങിയ ഇന്ത്യന്‍ ഏറ്റവും കൂടുതല്‍ കളക്ഷന്‍ നേടിയ തമിഴ് ചിത്രമായി അന്ന് മാറിയിരുന്നു. ആദ്യ 50 കോടി നേടുന്ന ദക്ഷിണേന്ത്യന്‍ ചിത്രവും ഇന്ത്യനായിരുന്നു. കമല്ഹാസന് മികച്ച നടനുള്ളതുള്‍പ്പെടെ മൂന്ന് ദേശീയ ചലച്ചിത്ര അവാര്‍ഡുകളും ചിത്രം നേടി.
27 വര്‍ഷങ്ങള്‍ക്ക് ശേഷം കമലഹാസന്‍ സേനാപതിയായി വരുന്നു എന്നതാണ് ചിത്രത്തിന്റെ ആകര്‍ഷണഘടകം . വേഷ പകര്‍ച്ചയില്‍ അസാമാന്യ വൈഭവമുള്ള കമലിന്റെ പഴയ കഥാപാത്രത്തിന്റെ പുതിയ മേക്കോവര്‍ കാണാന്‍ ആരാധകര്‍ ആവേശഭരിതരാണ് . വിക്രം എന്ന ബ്ലോക്ക്ബസ്റ്ററിന് ശേഷമാണ് ഇന്ത്യന്‍ 2 വരുന്നത് എന്നതും ശ്രദ്ധേയമാണ്.
Recent Comments