മലയാളത്തിന്റെ പ്രിയ താരം പൃഥ്വിരാജ് സുകുമാരന് ഇന്ന് 41-ാം പിറന്നാള്‍. നടനും നിര്‍മ്മാതാവും സംവിധായകനും ഗായകനുമൊക്കെയായി നിറഞ്ഞ് നില്‍ക്കുന്ന പൃഥ്വി ഭാഷയുടെ അതിര്‍വരമ്പുകള്‍ ഭേദിച്ച് മുന്നേറുകയാണ്. പൃഥ്വിക്ക് ജന്മദിനാശംസകള്‍ നേര്‍ന്ന് എത്തിയിരിക്കുകയാണ് എമ്പുരാന്റെ അണിയറ പ്രവര്‍ത്തകര്‍.
മുരളി ഗോപി, ആന്റണി പെരുമ്പാവൂര്‍, ദീപക് ദേവ്, സുജിത്ത് വാസുദേവ് എന്നിവരോടൊപ്പം മോഹന്‍ലാലും ആശംസകള്‍ നേരുന്ന വീഡിയോയാണ് ആശിര്‍വാദ് സിനിമാസ് പങ്കുവെച്ചിരിക്കുന്നത്. എമ്പുരാന്റെ ഷൂട്ടിങ് ഇപ്പോള്‍ ലഡാക്കില്‍ പുരോഗമിക്കുകയാണ്. മലയാളത്തിലെ ഏറ്റവും വലിയ ബജറ്റില്‍ ഒരുങ്ങുന്ന എമ്പുരാനായി കാത്തിരിക്കുകയാണ് ചലച്ചിത്ര ലോകം ഒന്നടങ്കം.
പിറന്നാളിന്റെ ഭാഗമായി പൃഥ്വി അഭിനയിക്കുന്ന പാന്‍ ഇന്ത്യന്‍ ചിത്രമായ സലാറിന്റെ സ്‌പെഷ്യല്‍ പോസ്റ്ററും പുറത്തുവിട്ടിരിക്കുകയാണ്. പോസ്റ്ററില്‍ താരത്തിനു ആശംസകളും നേര്‍ന്നിട്ടുണ്ട്. കെ.ജി.എഫിന് ശേഷം പ്രശാന്ത് നീലിന്റെ സംവിധാനത്തില്‍ വരുന്ന ചിത്രത്തില്‍ പ്രഭാസാണ് നായകന്‍. സലാറിന് പുറമെ, ആടുജീവിതം, വിലായത്ത് ബുദ്ധ, ഗുരുവായൂര്‍ അമ്പലനടയില്‍ എന്നിവയും പൃഥ്വിരാജിന്റെ വരാനിരിക്കുന്ന ചിത്രങ്ങളാണ്.
ലൂസിഫറില്‍ സംവിധായകനായി അരങ്ങേറ്റം കുറിച്ച പൃഥ്വി മലയാള സിനിമയുടെ വാണിജ്യ സാധ്യതകളെ മുഴുവന്‍ പ്രയോജനപ്പെടുത്തി. നടന്‍ എന്ന നിലയിലും അസൂയവഹമായ നേട്ടങ്ങളാണ് മറ്റു ഭാഷകളിലും പൃഥ്വി സ്വന്തമാക്കിയത്. നിലപാട് കൊണ്ടും സിനിമകള്‍ കൊണ്ടും മലയാളിയെ അമ്പരപ്പിക്കുന്ന പൃഥ്വിരാജിന് ജന്മദിനാശംസകള്‍.
Recent Comments