കമല്‍ഹാസന്‍-മണിരത്നം കൂട്ടുകെട്ടിലൊരുങ്ങുന്ന പുതിയ ചിത്രത്തിന്റെ അണിയറപ്രവര്‍ത്തകരെ പരിചയപ്പെടുത്തുന്ന വീഡിയോ പുറത്തിറങ്ങി. സംവിധായകന്‍ മണിരത്നത്തിനൊപ്പം സംഗീതസംവിധായകന്‍ എആര്‍ റഹ്‌മാനും എഡിറ്റര്‍ ശ്രീകര്‍ പ്രസാദും ഈ ചിത്രത്തിന്റെ ഭാഗമാകും. കള്‍ട്ട് ക്ലാസിക് ചിത്രമായ നായകന് ശേഷം കമല്‍ ഹാസനും മണിരത്നവും ഒന്നിക്കുന്ന ചിത്രത്തിന്റെ താല്‍ക്കാലിക പേരാണ് KH 234.
രാജ് കമല്‍ ഫിലിംസ് ഇന്റര്‍നാഷണല്‍, മദ്രാസ് ടാക്കീസ്, റെഡ് ജയന്റ് മൂവീസ് എന്നിവയുടെ ബാനറില്‍ കമല്‍ഹാസന്‍, മണിരത്നം, ആര്‍. മഹേന്ദ്രന്‍, ശിവ അനന്ത് എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്.
മണിരത്നത്തിന്റെ തന്നെ കന്നത്തില്‍ മുത്തമിട്ടാല്‍, ആയുധ എഴുത്ത് എന്നീ ചിത്രങ്ങളില്‍ പ്രവര്‍ത്തിച്ചിട്ടുള്ള രവി കെ. ചന്ദ്രനാണ് KH234 ന്റെ ഛായാഗ്രാഹകന്‍. വിക്രമിന് വേണ്ടി കമലുമായി സഹകരിച്ച അന്‍പറിവാണ് ആക്ഷന്‍ കൊറിയോഗ്രാഫര്‍. മേക്കപ്പ് രഞ്ജിത്ത് അമ്പാടിയും പ്രൊഡക്ഷന്‍ ഡിസൈനര്‍ ശര്‍മ്മിഷ്ഠ റോയിയും കോസ്റ്റ്യൂം ഡിസൈനര്‍ ഏകാ ലഖാനിയുമാണ്. വരും ദിവസങ്ങളില്‍ ചിത്രത്തിലെ അഭിനേതാക്കളുടെ വിവരങ്ങളും പുറത്ത് വിടുമെന്നാണ് അറിയുന്നത്. പി.ആര്‍.ഒ. പ്രതീഷ് ശേഖര്‍.
Recent Comments