ഒരാളെ ഇങ്ങനെ ഒക്കെ പറ്റിക്കാമോ..? പ്രേക്ഷകരുടെ പ്രിയ നടനും സംവിധായകനും ഗായകനും അങ്ങനെ എല്ലാമെല്ലാമായ വിനീത് ശ്രീനിവാസനെ പറ്റിച്ച് രസകരമായ ഒരു പ്രോമോ പുറത്തിറക്കിയിരിക്കുകയാണ് ഫിലിപ്പ്‌സ് ടീം. വെറുമൊരു ടീ-ഷര്‍ട്ട് കൊടുത്താണ് വിനീതിനെ പറ്റിച്ചിരിക്കുന്നത്. നിരവധി കഥാപാത്രങ്ങളിലൂടെ മലയാളികളുടെ പ്രിയ നടനായി തീര്‍ന്ന മുകേഷിന്റെ മുന്നൂറാമത് ചിത്രമാണ് ഫിലിപ്പ്‌സ്. മുകേഷിനോപ്പം ഇന്നസെന്റ്, നോബിള്‍ ബാബു തോമസ്, നവനി ദേവാനന്ദ്, ക്വിന്‍ വിബിന്‍ എന്നിവരും പ്രധാന കഥാപാത്രങ്ങളെ അവതരിപ്പിക്കുന്ന ചിത്രം ലിറ്റില്‍ ബിഗ് ഫിലിംസിന്റെ ബാനറില്‍ സുവിന്‍ കെ വര്‍ക്കി, പ്രശോഭ് കൃഷ്ണ എന്നിവര്‍ നിര്‍മ്മിച്ച് ആല്‍ഫ്രഡ് കുര്യന്‍ ജോസഫ് സംവിധാനം ചെയ്യുന്നു. ‘ഫിലിപ്പ്‌സ്’ നവംബര്‍ 24ന് തീയറ്ററുകളില്‍ പ്രദര്‍ശനത്തിനെത്തും. മാത്തുക്കുട്ടി സേവ്യറും ആല്‍ഫ്രഡും ചേര്‍ന്നാണ് ചിത്രത്തിന്റെ രചന നിര്‍വഹിച്ചിരിക്കുന്നത്. അന്തരിച്ച നടന്‍ ഇന്നസെന്റിന്റെ അവസാന ചിത്രമാണിത്. ശ്രീധന്യ, അജിത് കോശി, അന്‍ഷാ മോഹന്‍, ചാര്‍ലി, സച്ചിന്‍ നാച്ചി എന്നിവരും ചിത്രത്തില്‍ അഭിനയിക്കുന്നുണ്ട്.
മൂന്നു മക്കളുമൊത്ത് ബാംഗ്ലൂരില്‍ സ്ഥിരതാമസമാക്കിയ ഫിലിപ്പ് എന്ന ടൈറ്റില്‍ കഥാപാത്രത്തെയാണ് മുകേഷ് ഈ സിനിമയില്‍ അവതരിപ്പിക്കുന്നത്. ഒരു അപ്രതീക്ഷിത സംഭവം അവരുടെ ജീവിതത്തെ ആകെ മാറ്റി മറിക്കുന്നതാണ് സിനിമയുടെ പ്രമേയം. ബാംഗ്ലൂര്‍, കൊച്ചി എന്നിവിടങ്ങളിലായി ചിത്രീകരണം പൂര്‍ത്തിയാക്കിയ ചിത്രം പ്രദര്‍ശനത്തിനെത്തിക്കുന്നത് ഫന്റാസ്റ്റിക് ഫിലിംസാണ്.
Recent Comments